Prezident 2026-yil 2-oktabrda «Ayrim davlat oliy taʼlim muassasalarining boshqaruv tizimini yanada takomillashtirish chora-tadbirlari toʻgʻrisida»gi PQ–358-son qarorni imzoladi.
Qarorga muvofiq, Maktabgacha va maktab taʼlimi vazirligi hamda Ixtisoslashtirilgan taʼlim muassasalari agentligi tizimidagi jami 17 ta oliy taʼlim muassasasining idoraviy boʻysunuvi oʻzgartirildi.
Oʻzbekiston milliy pedagogika universiteti esa Nizomiy Ganjaviy nomidagi Oʻzbekiston milliy pedagogika universiteti deb qayta nomlandi.
Bundan tashqari, Maktabgacha va maktab taʼlimi vazirligining pedagog kadrlar tayyorlash sohasidagi qator vazifalari Oliy taʼlim, fan va innovatsiyalar vazirligiga yuklatildi.
Endi mazkur vazirlik yagona konseptual yondashuv asosida oliy maʼlumotli pedagog kadrlar tayyorlash siyosatini yuritadi va pedagogik taʼlimni rivojlantirishning asosiy yoʻnalishlarini belgilaydi.
Shuningdek, vazirlik zimmasiga pedagogik taʼlimning uzviyligi va uzluksizligini taʼminlash, taʼlim-tarbiya jarayoniga ilgʻor pedagogik hamda axborot texnologiyalarini joriy etish vazifalari yuklatildi.
Pedagogika sohasida ilmiy-tadqiqot va innovatsion faoliyatni rivojlantirish, pedagog kadrlar tayyorlaydigan oliygohlarning boshqaruv tizimini takomillashtirib borish ham uning vazifalari qatoriga kiritildi.
