Nuraziz Ungboyev 18 yoshda. U dunyoning top-20 oliygohlari qatorida turadigan Chikago universitetiga to‘liq grant bilan qabul qilingan. O‘qituvchilar oilasida katta bo‘lgan Nuraziz Kun.uz muxbiri bilan suhbatda top universitetgacha bosib o‘tgan yo‘li, o‘rta ta’limdan so‘ng nima uchun bir yil tanaffus olgani va muvaffaqiyat siri haqida gapirib berdi.
Nuraziz Ungboyev matematika va informatika bo‘yicha qator olimpiadalar sovrindori. U Robocontest.uz platformasi loyiha menejeri bo‘lib ham ishlagan. Nurazizning fikricha, undagi ilmga bo‘lgan qiziqish tasodif emas, balki oiladagi muhit mahsuli.
“Bizning uyimizda hamma – opalarim, onam ham ustoz. Dadam esa O‘zbekiston Milliy universitetida matematika fanidan dars beradi. Uyga kelganimda doim kimdir kitob o‘qiyotgan bo‘lardi. Katta kutubxonamiz bor edi. Ana shu muhit ta’sirida 13 yoshimdan matematikaga qiziqa boshladim va olimpiadalar bilan jiddiy shug‘ullandim”, - deydi u.
Nuraziz maktabni bitirgach, oliy ta’lim muassasasiga hujjat topshirmay, bir yil tayyorgarlik davri (gap year) olishga qaror qilganida yaqinlari va atrofidagilarning qattiq qarshiligiga duch kelgan.
“Bir yil gap year olganimda qarindoshlarimiz, o‘rtoqlarim: ‘Nega bunday qilyapsan? O‘zbekistonda ham top universitetlar bor-ku, shu yerda o‘qishing mumkin’, degan gaplarni ko‘p aytgan. Lekin o‘zimga juda ishonardim va top universitetga kirishimga ishonchim komil edi. Shunchaki ularning gaplariga e’tibor bermadim. Fikrimni o‘zgartirmaslik uchun ularning ko‘ziga kamroq ko‘rinishga harakat qildim”, - deydi Nuraziz.
Dunyoning nufuzli oliygohlari orasidan nega aynan Chikago universitetini tanlagani haqida gapirarkan, u oliy ta’limdagi eng muhim mezonlardan biri – talabaning qadriyatlari universitetniki bilan mos kelishi kerakligini ta’kidlaydi. Uning fikricha, ko‘plab yoshlar universitet nomiga e’tibor qaratadi, biroq muvaffaqiyatning asosiy omili muhit va qadriyatlarning mosligidir.
“Top universitetlarda qadriyatlar va moslik degan tushunchalar bor. Ya’ni sizning qadriyatlaringiz universitet qadriyatlari bilan mos kelishi kerak. Menga eng mos kelgani Chikago universiteti bo‘ldi. Sababi, ularning ilmga bo‘lgan hurmati va e’tibori juda katta. Har bir talaba bilan suhbatlashganingizda, asosan ilm-fan va tadqiqotlar haqida gaplashasiz. Ushbu universitet bitiruvchilari orasidan 101 nafar Nobel mukofoti sovrindori yetishib chiqqan. Bu esa universitetning dunyodagi eng yetakchi oliygohlardan biri ekanini ko‘rsatadi.
Nobel mukofotini qo‘lga kiritish mening ham asosiy maqsadlarimdan biridir”, - dedi u.
Intervyuni to‘liq holda Kun.uz’ning YouTube’dagi kanali orqali tomosha qilish mumkin.
