5-sinfdan 11-sinfgacha yagona sinf rahbari tayinlanadi

5-sinfdan boshlab 11-sinfga qadar yagona sinf rahbarini tayinlash bo‘yicha Nizom joriy etildi. Yangi Nizomga ko‘ra, 5-sinfdan boshlab 11-sinfga qadar yagona sinf rahbari tayinlash yo‘lga qo‘yiladi va barcha maktablarda sinf rahbarlari quyidagi umumiy talablarga javob berishi lozim:

• kamida 3 yillik pedagogik ish stajiga ega bo‘lishi;
• maktabda to‘liq stavkada aosiy ishchi sifatida faoliyat yuritishi;
• bo‘linib o‘qitiladigan fanlardan dars bermasligi;
• odob-axloqi va xulqi bilan o‘quvchilarga shaxsiy namuna bo‘la olishi;
• ruhiy jihatdan barqaror bo‘lishi;
• o‘quvchilar bilan ishlash jarayoniga mas'uliyat bilan yondasha olishi.

Shuningdek, qabul qilingan yangi nizomga muvofiq, sinf rahbarlarining:

• amaldagi hujjatlari soni optimallashtirildi;
• faoliyatini baholash mezonlari yaratildi;
• malaka oshirish kurslari ishlab chiqildi;
• ota-onalar bilan ishlash tizimi takomillashtirildi.

Vazirlik matbuot kotibi Laylo Rustamova Kun.uz muxbiriga ma'lum qilishicha, sinf rahbari oilaviy sharoitiga yoki boshqa sabablarga ko‘ra ish joyini o‘zgartirgan holatlarda maktab direktori tomonidan u rahbarlik qilayotgan sinfga boshqa sinf rahbari tayinlanadi.

«Agar ota-onalar tomonidan sinf rahbarining faoliyatiga e'tirozlar mavjud bo‘lsa, sinf o‘quvchilarining ota-onalari maktab direktori nomiga sabablarni ma'lum qilgan holda murojaat qilishadi. Direktor ota-onalarning murojaatida keltirilgan ma'lumot va real vaziyatga baho bergan holda sinf rahbari bilan suhbatlashadi, bordi-yu vaziyat barqarorlashmasa, u rahbarlik qilayotgan sinfga belgilangan mezonlar asosida boshqa sinf rahbarini tayinlaydi», deydi Laylo Rustamova.

Qayd etilishicha, amalga oshirilayotgan ushbu o‘zgarishlardan kutilayotgan asosiy natijalar:

- sinf rahbarlarining o‘quvchilar tarbiyasiga ta'siri sezilarli ravishda oshishi;

- 5-sinfdan 11-sinfgacha yagona sinf rahbarining biriktirilishi natijasida sinfdagi ijtimoiy muhitni sog‘lom ravishda ushlab turish imkoni;

- ota-onalar tomonidan o‘z farzandlarini ta'lim-tarbiya jarayoniga nisbatan qiziqishining ortishidir.