O‘quvchini urgan o‘qituvchi voqeasiga rasmiy baho berildi

Bu postlarda maktabdagi voqea “adolatli yakun topgani” aytiladi.

“O‘qituvchi aybsiz deb topildi! Aniqlanishicha, muallim dars jarayonini va o‘z kasbiy sha’nini qonuniy doirada himoya qilgan. Intizomni buzgan, ustoziga bepisand munosabatda bo‘lgan o‘quvchilarning ota-onalariga nisbatan esa qonuniy tartibda ma’muriy javobgarlik choralari ko‘rildi”, – deyiladi MMTV o‘z kanalida ulashgan xabarda.

O‘qituvchi izohi

Reportajda sinfxonadagi kuzatuv xonasidan olingan videolavha joy olgan. Undan ma’lum bo‘lishicha, dars vaqtida eng orqa partadagi o‘quvchilardan biri qora futbolkadagi (keyinroq o‘qituvchi tomonidan kaltaklangan) boshqa bir o‘quvchining boshiga dars vaqtida suv quygan, bunga javoban qora futbolkadagi yigit ham o‘rnidan turib unga suv sepa boshlagan.

Shundan keyin o‘qituvchi ikkala o‘quvchini eshik oldiga chaqirib, sinfxonadan tashqariga chiqarmoqchi bo‘lgan va qora futbolkali yigit – R.R.ning yelkasidan ushlagan.

“Yuring, tashqariga chiqaylik deganimda, [sensirab] “qo‘lingni ol” dedi. Bir shapaloq urdim. U ikkita musht otdi menga. Oyog‘imdan ushlab yiqitmoqchi... Eshikni tepib, so‘kmagan gapi qolmadi. Menda birovni urish niyatim bo‘lmagan; to‘g‘ri, qizishib ketdim, faqat o‘zining javobidan keyin shunaqa vaziyat bo‘lib qoldi”, – deya voqeaga izoh bergan Zokir Omonov poytaxt IIBB matbuot xizmati bilan suhbatda.

Bu o‘quvchilar bo‘yicha boshqa e’tirozlar

275-maktab o‘qituvchilariga ko‘ra, bu ikki o‘quvchining xulqi avvaldan yaxshi bo‘lmagan.

“Mana shu ikkita o‘quvchi ishtirokida bir necha marotaba janjal holatlari, agressiv holatlar uchrab turgan. Bu holatlar bo‘yicha biz ularning ota-onalari bilan hamkorlikda ishlab kelganmiz, ma’lumot berilgan, maktabga chaqirtirilgan”, – degan intervyuda maktab jamoasi vakillaridan biri.

Ayol pedagoglardan biri ko‘zda yosh bilan intervyu berarkan, informatika darsidagi 19 may kungi voqeadan bir necha avval – 7 may kuni xuddi shu bolalardan biri uni qattiq haqorat qilganini aytadi:

“Bu bolalar oldin ham dars o‘tishimizga xalaqit qilgan. Bola juda agressiv holatda: “qo‘lingni tort” deb, birdaniga senlashga o‘tib ketdi. Orqasidan to‘rt-besh marta so‘kish, haqorat so‘zlarini ishlatdi. 20 yillik stajimda hali biron marta bironta o‘quvchi so‘kib haqorat qilmagan”.

“Ortingizda armiya bor, pogonlilar bor, generallar bor!”

Ichki ishlar rahbarlari ishtirokida maktabda bo‘lib o‘tgan yig‘ilishda Toshkent shahar IIBB boshlig‘i Ravshan Sultonxo‘jayev o‘qituvchiga nisbatan qo‘zg‘atilgan jinoyat ishi batamom tugatilganini e’lon qilgan. Pedagogik jamoa buni qarsaklar bilan kutib olgan.

“Har bitta o‘qituvchiga nisbatan ko‘tarilgan qo‘l, haqorat javobsiz qolmaydi. Farzandning tarbiyasiga bevosita ota-ona javobgar”, – degan Sultonxo‘jayev.

Ichki ishlar vazirining birinchi o‘rinbosari – Jamoat xavfsizligi departamenti boshlig‘i Rustam Jo‘rayev yig‘ilishda butun respublika o‘qituvchilariga murojaat qilgan:

“Butun respublikaning o‘qituvchilari eshitishi kerak: sizlar muhtaram prezidentimiz, administratsiya rahbariyati himoyasidasizlar. Butun O‘zbekistonning o‘qituvchilari, ota-onalar, o‘quvchilar bilishi kerak bu narsani!

Sizlarning orqalaringizda armiya bor, pogonlilar bor, generallar bor!” – degan general Jo‘rayev.