UzAuto Motors oktabr-noyabr oylarida Lacetti va Labo yetkazib berish bo‘yicha shartnomalarini bajara olmaydi

UzAuto Motors kompaniyasining ma'lum qilishicha, yarimo‘tkazgichlar yetishmovchiligi tufayli, oktabr va noyabr oylarida Lacetti va Labo avtomobillarini kutayotgan xaridorlar bilan tuzilgan shartnomalarni o‘z vaqtida bajarish imkoniyati mavjud emas. Xaridorlar yana 2 oygacha kutishlariga to‘g‘ri keladi.

Kompaniya mazkur vaziyatda shartnomaning 3.1.1 bandini qo‘llashga to‘g‘ri kelishini ma'lum qilgan.

«UzAuto Motors'ga bog‘liq bo‘lmagan holatlar, xususan, yarimo‘tkazgichlardan (mikrochiplardan) tayyorlangan butlovchi qismlarning global taqchilligi sababli kompaniya 3.1.1 bandini qo‘llashga hamda 3.1 bandda ko‘rsatilgan Chevrolet Lacetti hamda Labo avtomobillarining kutilayotgan yetkazib berish muddatini 2 oyga uzaytirishga majbur», deyilgan xabarda.

Avvalroq, kompaniya 4-pozitsiya Chevrolet Cobalt'ni kutayotgan mijozlarga avtomobilni isitish o‘rindig‘i modulisiz taklif etgandi. Ushbu holatga ham mikrochiplarning global tanqisligi sabab sifatida ko‘rsatilgandi.