18:25 / 14.07.2022
6116
Turkiya, Misr va Saudiya Arabistoni BRIKS guruhiga qo‘shilishi mumkinligi aytildi

Qayd etilishicha, mazkur mamlakatlar hamda iyun oxirida ariza bergan Eron va Argentinaning guruhga kirishi 2023 yilda JARda bo‘lib o‘tadigan sammitda amalga oshishi mumkin. 

Foto: Global Look Press

Turkiya, Misr va Saudiya Arabistoni BRIKS guruhiga qo‘shilishga tayyorgarlik ko‘rmoqda, deb xabar berdi «Izvestiya» BRIKS xalqaro forumi prezidenti Purnima Anandga asoslanib.

«Bu mamlakatlar qo‘shilishga qiziqish bildirdi va a’zolikka ariza berishga tayyorlanmoqda. Bu yaxshi qadam deb o‘ylayman, chunki kengayish hamisha ijobiy qabul qilinadi, bu BRIKSning butun dunyodagi ta’sirini kuchaytiradi», — dedi u.

Anandning so‘zlariga ko‘ra, mazkur mamlakatlar kirish «jarayonida» turibdi, shu bois ular hamda iyun oxirida ariza bergan Eron va Argentinaning guruhga kirishi 2023 yilda JARda bo‘lib o‘tadigan sammitda amalga oshishi mumkin. 

«Izvestiya» manbasining so‘zlariga ko‘ra, Pekinda bo‘lib o‘tgan sammitda BRIKS a’zolari Saudiya Arabistonining a’zo bo‘lishi masalasini «jiddiy» muhokama qilgan, Turkiya va Misr mavzusi esa ko‘tarilmagan.

Hozirda BRIKSga besh mamlakat - Braziliya, Rossiya, Hindiston, Xitoy va JAR a’zo. Guruh 2006 yilda tashkil topgan. BRIKSning maqsadi siyosiy, iqtisodiy va millatlararo darajadagi har tomonlama hamkorlikni rivojlantirishdan iborat. 

Mavzuga oid
Top