BRICS vs G7: 2026 yil YaIM o‘sishi prognozlari - BRICS ustun

Qator G‘arb davlatlaridan farqli o‘laroq, BRICS tarkibidagi ko‘plab mamlakatlar yirik investitsiyalar, faol savdo va qulay demografik o‘zgarishlar tufayli yalpi ichki mahsulot (YaIM)ning jadal o‘sishini namoyon etmoqda. Ko‘p qutbli dunyo shakllanayotgan sharoitda bu guruh kengayib, o‘z ta’sirini kuchaytirmoqda.

Ushbu infografikada BRICS va “Katta yettilik” mamlakatlari uchun 2026 yilga mo‘ljallangan real YaIM o‘sishi prognozlari XVJning oktyabr oyidagi “Jahon iqtisodiyoti taraqqiyoti istiqbollari” sharhi ma’lumotlari asosida taqqoslandi.

Hindiston blok doirasida eng yuqori o‘sish sur’atlaridan birini namoyon qilishi kutilmoqda: 2025 yilda 6,6 foiz, 2026 yilda esa 6,2 foiz. Osiyo, Yevropa va Afrika bo‘ylab savdo aloqalarini mustahkamlayotgan Xitoy uchun 2025 yilda 4,8 foiz o‘sish bashorat qilingan. Hindistondagi kabi, 2026 yilda uning o‘sish sur’atlari biroz pasayishi kutilmoqda. Boshqa tarafdan, Rossiya iqtisodiyotining o‘sish sur’ati 2026 yilda joriy yildagi 0,6 foizga nisbatan 1 foizgacha oshishi prognoz qilingan.

O‘rtacha hisobda, BRICS iqtisodiyotining o‘sishi 2025 hamda 2026 yillarda “Katta yettilik” ko‘rsatkichlaridan uch barobardan ko‘proq ustun bo‘lishi kutilmoqda — bu esa keskin tafovutni yuzaga keltiradi. “Katta yettilik” davlatlari uchun o‘rtacha prognoz 1 foiz atrofida bo‘lib, ularning ko‘pchiligi aholi qarishi va xalqaro savdo sohasidagi noaniqlik kabi to‘siqlar bilan to‘qnashmoqda.

E’tiborli jihati shundaki, Germaniyada 2025 yil uchun YaIM o‘sishining dunyo bo‘yicha eng past darajalaridan biri — atigi 0,2 foiz deb bashorat qilingan. Ammo 2026 yilda u 0,9 foizgacha tezlashishi kutiladi — bu tendensiya “yettilik”ning ayrim boshqa davlatlarida ham kuzatilmoqda.