17:37 / 18.09.2022
13267
Zelenskiy Qrimni diplomatik yo‘l bilan qaytarish mumkinligi haqida gapirdi
Foto: Insider

Ukraina prezidenti Volodimir Zelenskiy Reuters uchun bergan intervyusida Qrim Ukraina nazoratiga diplomatik yo‘l bilan qaytarilishi ehtimoli haqida gapirdi.

«Shunday bo‘lishi mumkin. Albatta, Ukrainada odamlar bu masalani diplomatik yo‘l bilan hal etish variantini ko‘proq qo‘llab-quvvatlamoqda. [Ammo] bu masalani odamlarning qaysi doirasi muhokama qilishi va bu qachon bo‘lishini hozir ayta olmayman», — degan u.

Prezident Reuters muxbirining Qrimda Rossiyaning ko‘plab harbiy bazalari joylashganini inobatga olgan holda, yarimorolni Ukrainaga qaytarish istiqbollari borasidagi savoliga javob qaytargan.

Zelenskiy Ukraina «faqat o‘zining barcha yerlarini qaytargachgina, xotirjam uxlashi mumkinligi»ni qayd etgan. «Boshqa imkoni yo‘q, shunchaki boshqa chiqish yo‘li yo‘q, hududlarni ozod etish kerak», — degan u.

Urushning ilk haftalarida Ukraina hukumati Qrimga egalik qilish masalasida Rossiya bilan murosa qilishga tayyor edi, xususan, bu masalani harbiy yo‘l bilan hal qilishdan 15 yil muddatga tiyilib turish haqida taklif bo‘lgan. Hozirda Kiyev Rossiya bilan faqatgina RF harbiylari Ukrainaning butun hududini tark etsagina muzokara o‘tkazishga tayyor.

Avgust oyida ukrain harbiylari Rossiyaning Qrimdagi aviabazalariga zarbalar yo‘lladi. Sentyabr oyi boshida Ukraina qurolli kuchlari bosh qo‘mondoni Valeriy Zalujniy o‘z maqolasida urush istiqbollari haqida so‘z yuritib, 2023 yilda Qrimni ozod etish bo‘yicha harbiy amaliyot o‘tkazilishi mumkinligini aytgandi, shu bilan birga, buning uchun Ukrainaga «G‘arbning yetakchi mamlakatlarining ishlab chiqarish bazalari va zaxiralari»dan foydalanish talab etilishini ta’kidlagandi.

Mavzu
Rossiya-Ukraina urushi
2022 yil 22 fevral kuni Rossiya Ukraina chegarasidan o‘tib, qo‘shni mamlakatga bostirib kirdi. Ukraina armiyasi jang taklif qildi.
Barchasi
Top