AQSh qiruvchi samolyotlari Rossiyaning ikkita bombardimonchi samolyotini tutib oldi

17 oktyabr kuni AQSh harbiy-havo kuchlarining ikkita F-16 qiruvchisi Alyaska shtati ustidagi havo hujumidan mudofaa tizimi zonasida (ADIZ) Rossiyaning ikkita Tu-95 (NATO tasnifida Bear-H ) raketa tashuvchi strategik bombardimonchi samolyotini tutib oldi. Bu haqda 18 oktyabr, seshanba kuni Shimoliy Amerika aerokosmik mudofaa qo‘mondonligining (NORAD) ushbu mintaqadagi vakolatxonasida ma’lum qilindi.

NORAD Amerika Qo‘shma Shtatlari va Kanada milliy havo kengliklariga hech qanday bosqinlar bo‘lmaganini ta’kidladi. ADIZ - suveren havo hududidan tashqarida joylashgan perimetr, u yerda raqib tomonidan dushmanlik harakati sodir bo‘lganda qo‘shimcha javob vaqtini ta’minlash uchun harakat nazorat qilinadi.

Rossiya raketa tashuvchilarining ADIZ zonasidagi faolligi Amerika tomoni tomonidan tahdid yoki provokatsiya sifatida baholanmagan.

NORAD ADIZ'ga kiradigan xorijiy harbiy samolyotlarni aniqlaydi, ularning harakatlarini muntazam kuzatib boradi va kerak bo‘lsa, ular ushbu zonani tark etguniga qadar ularga hamrohlik qiladi, deb xabar berdi qo‘mondonlik.

AFP agentligining ta’kidlashicha, ushbu hududda Rossiya samolyotlarini tutib olish muntazam ravishda sodir bo‘ladi.

Politico nashrining 27 sentabr kuni xabar berishicha, Qo‘shma Shtatlar va uning ittifoqchilari razvedka xizmatlari yadroviy zarbaga tayyorgarlik ko‘rish jarayonini aniqlash imkoniyatiga ega bo‘lish uchun Rossiyani havo, koinot va kiberkosmosda kuzatishni kuchaytirgan.

Politico suhbatdoshlarining tushuntirishicha, Rossiya samolyotlarining aksariyati nafaqat oddiy raketalar, balki qit’alararo ballistik raketalar kabi strategik qurilmalardan ko‘ra jang maydonida ko‘proq maqsadli foydalanish uchun mo‘ljallangan kichikroq taktik yadro qurollari bilan jihozlanishi mumkin.