Prezident yuk va yo‘lovchi tashish tizimiga oid yangi qaror imzoladi. 1 iyuldan qator talablar bekor qilinadi

O‘zbekiston Respublikasi Prezidenti «Yuk va yo‘lovchi tashish tizimini tubdan takomillashtirish chora-tadbirlari to‘g‘risida»gi qarorni imzoladi.

Hujjat bilan Transport vazirligi, Ichki ishlar vazirligi, Adliya vazirligi va «O‘zstandart» agentligining 2019 yil 1 iyuldan e'tiboran quyidagilarni bekor qilish to‘g‘risidagi takliflariga rozilik berildi:

a) xalqaro tashuvlarda foydalaniladigan shatakchi avtomobillarga litsenziya kartochkalarini berish uchun davlat bojini to‘lash tartibi;

b) quyidagilarni majburiy sertifikatlash:

«Yevro-5» va «Yevro-6» ekologik sinflari talablariga javob beradigan, Yevropa ittifoqi mamlakatlarida ishlab chiqarilgan hamda olib kiriluvchi yangi yuk va maxsus avtotransport vositalarni, shuningdek, yuklarni avtomobil transportida tashish uchun tirkama va yarim tirkamalarni;

transport-ekspeditorlik xizmatlarini;

v) yo‘lovchilarni tashish uchun foydalaniladigan avtotransport vositalarida nazorat-kassa apparati mavjudligi to‘g‘risidagi talabni, agar chek berilishi yoki yo‘lovchi safarini elektron ro‘yxatga olish imkoniyati mavjud bo‘lsa;

g) malaka talablariga muvofiqlik uchun attestatsiyadan o‘tish to‘g‘risidagi talab:

avtomobil transportida yuk tashish bilan shug‘ullanadigan yakka tartibdagi tadbirkorlar;

korxona shtatida avtotransport vositalari ekspluatatsiyasi va tashuvlar xavfsizligini ta'minlash uchun mas'ul bo‘lgan mutaxassis alohida birligi mavjud bo‘lganda, shuningdek, belgilangan tartibda attestatsiyadan o‘tganda, yuridik shaxsning rahbari;

d) avtomobil transportida yo‘lovchilar va yuklarni tashish bo‘yicha faoliyatni amalga oshirish uchun litsenziya olishda yuridik shaxslar balansida avtotransport vositalarining mavjudligi to‘g‘risidagi talab.