14:13 / 19.04.2020
42786

Karantin qoidalari buzilganda avtomashina jarima maydoniga qo‘yilishi qonuniymi?

Oliy Majlis Qonunchilik palatasi deputati Rasul Kusherbayev karantin qoidalarini buzgan haydovchilarning avtotransport vositalari jarima maydoniga qo‘yilishini noqonuniy deb hisoblamoqda. Adliya vazirligi mas'uli xodimi esa bunday fikrda emas.

Foto: KUN.UZ

Deputat nimadan norozi?

Qonunchilik palatasi deputati Rasul Kusherbayev o‘zining ijtimoiy tarmoqlardagi sahifalari orqali so‘nggi vaqtlarda deputatlarning huquqbuzarliklarga oid holatlar ommaviy axborot vositalarida bo‘rttirib ko‘rsatilayotgani haqidagi e'tirozi orasida karantin qoidalarini buzgan haydovchilarning avtotransport vositalari jarima maydoniga qo‘yilishi noqonuniy ekanligi haqida fikr yuritgan.

«Ma'muriy javobgarlik to‘g‘risidagi kodeksning 291-moddasida transport vositalarini ushlab turish asoslari keltirib o‘tilgan bo‘lib, unda ushbu kodeksning 54-moddasi talablari, ya'ni epidemiyaga qarshi kurash qoidalarini buzganlik uchun transport vositalarini vaqtincha ushlab turish keltirilmagan. Bundan kelib chiqadiki, joylarda karantinga rioya etmaganlik sababidan avtomobillarni jarima maydonlariga tiqib qo‘yish noqonuniydir. U yerda turgan har bir kun uchun to‘lov ham bor. Negadir bunga ko‘z yumishga harakat qilinyapti. Kodeks bu – qonun. Qaror, topshiriq, buyruqlar qonundan ustunmas», deydi R.Kusherbayev.

Adliya vazirligi mas'ul xodimi nima deydi?

O‘zbekiston Respublikasi Adliya vazirligi mas'ul xodimi G‘aybullo Primov esa biroz boshqacha fikrda. Uning so‘zlariga ko‘ra, Ma'muriy javobgarlik to‘g‘risidagi kodeksning 291-moddasida transport vositalarini ushlab turish va ko‘rikdan o‘tkazish asoslari va tartibi belgilangan bo‘lib, unga ko‘ra ichki ishlar organlari tomonidan MJtKning 10dan ortiq moddasida nazarda tutilgan 50ga yaqin qoidabuzarliklar bo‘yicha transport vositalari jarima maydonchasiga joylashtirilishi mumkin.

Shuningdek, kodeksning mazkur moddasida qonun hujjatlarida to‘g‘ridan-to‘g‘ri nazarda tutilgan boshqa hollarda ham transport vositalarini jarima maydoniga joylashtirish mumkinligi belgilangan.

Ma'lumki, prezident Shavkat Mirziyoyevning shu yil 29 yanvardagi  F-5537-sonli Farmoyishiga muvofiq koronavirusga qarshi kurash bo‘yicha Respublika maxsus komissiyasi tashkil etildi. Mazkur komissiyasining o‘z vakolatlari doirasida qabul qilgan qarorlari barcha uchun bajarilishi majburiy hisoblanadi.

Komissiyaning 2020 yil 4 apreldagi qarorida yo‘l-patrul xizmati xodimlari karantin davrida avtotransport vositasini maxsus ruxsatnomasiz boshqarganlik uchun transport vositasini jarima maydonchasiga joylashtirish yo‘li bilan ushlab turishi mumkinligi belgilangan.

Shundan kelib chiqib, karantin davrida avtotransport vositasini maxsus ruxsatnomasiz boshqarganlik uchun ularni jarima maydonchasiga joylashtirish qonuniy hisoblanadi deb xulosa qilish mumkin», deb hisoblamoqda vazirlik vakili.

Xulosa o‘rnida

Ta'kidlash joizki, Adliya vazirligi mas'ul xodimi o‘z izohida avtotransport vositasini maxsus ruxsatnomasiz boshqarganlik uchun jarima maydonchasiga joylashtirish yo‘li bilan ushlab turishi mumkinligini aytmoqda. Chunki amaliyotda avtotransport vositasini maxsus ruxsatnomasiz boshqargan shaxslar ham MJtKning 54-moddasi bilan javobgarlikka tortilmoqda.

Deputat esa aynan qanday usulda karantin qoidalari buzilganda avtotransport vositalari jarima maydoniga joylashtirilayotganidan noroziligiga aniqlik kiritmagan.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top