Kuz-qish mavsumida iste’molchilarga tabiiy gaz va elektr energiyasi yetkazib berish hajmi oshiriladi 

Bosh vazir o‘rinbosari, energetika vaziri Jo‘rabek Mirzamahmudov tizim tashkilotlari va yoqilg‘i-energetika sohasida faoliyat yuritayotgan korxonalarda kuz-qish mavsumiga tayyorgarlik ko‘rish bo‘yicha olib borilayotgan ishlarning holati, mavjud muammolar va ularni hal etish masalalari yuzasidan yig‘ilish o‘tkazdi. 

Unda soha obektlarini 2022/2023-yillar kuz-qish davriga to‘liq tayyorlash, iste’molchilarni energiya resurslari bilan barqaror ta’minlash ishlarining bugungi kundagi holati muhokama qilindi.  

Yig‘ilishda kuz-qish davrida iste’molchilarga jami 30,6 mlrd kub metr tabiiy gaz yetkazib berilishi yuzasidan topshiriq berildi. Shundan 10,4 mlrd kub metr gaz aholiga va 20,2 mlrd kub metr gaz iqtisodiyot tarmoqlariga yetkaziladi. 

Aholi ehtiyojidan kelib chiqib, joriy yil yakuniga qadar 12,7 ming dona qo‘shimcha maishiy gaz balloni yetkazib berish lozimligi belgilandi. 

Shuningdek, olis va borish qiyin bo‘lgan qishloq, ovullarda ko‘mir, suyultirilgan gaz zaxirasini yaratishda 168 mingdan ziyod xonadonga 10 693 tonna suyultirilgan gaz yetkazib berilishini ta’minlash choralari ko‘riladi. 

15 sentabrdan boshlab bugungi kungacha aholi iste’molchilariga 144 ming tonna ko‘mir yetkazib berilgan. Yil yakuniga qadar 882 ming tonna ko‘mir yetkazib berish bo‘yicha ko‘rsatmalar berildi. 

Kuz-qish davrida respublika iste’molchilariga jami 34 mlrd 918 mln kilovatt-soat (o‘tgan kuz-qish mavsumiga nisbatan 2 mlrd 540 mln kilovatt-soatga ko‘p) elektr energiyasi yetkazib berilishi yuzasidan topshiriq berildi. Mavsum davomida aholiga 10 mlrd 938 mln kilovatt-soat elektr energiyasi yetkazib beriladi. 

Shuningdek, energiya resurslari ta’minotini nazorat qiluvchi doimiy shtab faoliyati yo‘lga qo‘yiladi.