Samarqand viloyati hokimligi boshqaruvi tuzilmasida o‘zgarish: Endi «Urgut» EIZ rahbari viloyat hokimi o‘rinbosari hisoblanadi

Joriy yil 3 iyun kuni Vazirlar Mahkamasining «Samarqand viloyati hokimligi boshqaruvi tuzilmasida o‘zgartirish kiritish to‘g‘risida» 342-sonli qarori qabul qilingan. Qarorga ko‘ra, «Samarqand viloyati hokimining sanoatni rivojlantirish masalalari bo‘yicha o‘rinbosari – Urgut erkin iqtisodiy zonasi direksiyasi rahbari» lavozimi joriy etilgan.

Bundan tashqari, «Samarqand viloyati hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari» lavozimi «Samarqand viloyati hokimining kapital qurilish, kommunikatsiyalar va kommunal xo‘jalik masalalari bo‘yicha o‘rinbosari» lavozimi etib qayta nomlangan.

Qayd etilishicha, mazkur qarordan so‘ng, «Urgut» EIZ rahbari Jamshid Haydarov viloyat hokimining sanoatni rivojlantirish masalalari bo‘yicha o‘rinbosari lavozimini egallaydi.

Shu paytgacha viloyat hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari lavozimida ishlab kelgan Akmal Shukurov viloyati hokimining kapital qurilish, kommunikatsiyalar va kommunal xo‘jalik masalalari bo‘yicha o‘rinbosari lavozimida ishlaydi.

Qarorda ta'kidlanishicha, «Samarqand viloyati hokimining sanoatni rivojlantirish masalalari bo‘yicha o‘rinbosari – Urgut erkin iqtisodiy zonasi direksiyasi rahbari» lavozimini joriy etish taklifi viloyat hokimligi, Investitsiyalar va tashqi savdo vazirligi hamda Iqtisodiy taraqqiyot va kambag‘allikni qisqartirish vazirligi tomonidan taklif etilgan.

Qarorda shuningdek, Samarqand viloyati hokimining sanoatni rivojlantirish masalalari bo‘yicha o‘rinbosari – Urgut erkin iqtisodiy zonasi direksiyasi rahbarining kotibiyat mudiri lavozimi ham joriy etilgan.

Samarqand viloyati hokimligi axborot xizmati rahbari Manuchehr Mirzayevning Kun.uz’ga ma'lum qilishicha, 4 iyun kuni Vazirlar Mahkamasining yuqoridagi qarori ijrosi yuzasidan viloyat hokimining ham qarori qabul qilingan.