Samarqandda odamlardan avtomobillarini sotib berishni vaʼdasi bilan olib, pulini bermay yurgan ichki ishlar xodimiga nisbatan sud hukmi oʻqildi.
Mazkur jinoyat va unda gumonlanayotgan leytenant Bunyod Yazdonov haqida Kun.uz avvalroq surishtiruv eʼlon qilgan edi.
“Sevimli” telekanalining “Zamon” dasturi xabariga koʻra, ushbu shaxs jinoiy epizodlarning birinchi qismi boʻyicha sudda 8 yilga ozodlikdan mahrum etilgan.
Firibgarlikda aybdor deb topilgan Bunyod Yazdonov IIB yoʻl-harakati xavfsizligi xizmati leytenanti boʻlgan. Unga ishonib aldangan fuqarolarning ishonchiga avvalo uning formasi va lavozimi sabab boʻlgan. Odamlar uni davlat tizimi vakili sifatida qabul qilgan. Chunki u fuqarolar oldiga formada, xizmat mashinasida kelgan. Odamlardan qimmatbaho mashinalarini sotib berishini, qisqa muddatda pullarini qaytarib berishini aytib ishontirgan.
Toyloq tumanida oʻnlab, ehtimol yuzlab odamlar uning vaʼdalariga aldangani aytilmoqda. Jabrlanganlar soni koʻp, shu bois yetkazilgan zarar miqdori ham katta. Bunyod Yazdonov suddagi koʻrsatmasida millionlab dollarlar haqida gapirgan.
“Bu mavzu toʻrt yildan beri davom etyapti. Keladi, mashinam bor deydi. Keladi, pulim bor deydi. Keladi, uyim bor deydi... Kimga yoqmaydi 10 ming dollar pulini 15 ming dollar qilib... Masalan, bitta fuqaro pul bergan boʻlsa, ikkinchisini yetalab keladi.
Koʻchadan olgan boʻlsam, boshida zoʻr boʻlsa 1 mln dollar pul olganman, hisoblasa 1 mln dollarga ham yetmaydi. Hozirgi kecha-kunduzga hisoblasangiz, 3 mln... eh-he, toʻlangan pullar taxminan 2 mln dollarga yaqin. 5 mln, deyarli 6 mln dollar mening boʻynimga eski foiz-moiz bilan qoʻshilib kelyapti”, – degan sobiq IIB xodimi.
Bunyod Yazdonov sudda bir ayolning vaʼdalariga ishonib, ushbu holatga tushib qolganini aytgan (bu ayol haqida Kun.uz surishtiruvida ham soʻz borgandi).
