Murojaatdan so‘ng: minglab fuqarolar stiker uchun bergan arizasini qaytarib oldi

«Kecha ijtimoiy tarmoqlarda agentlik rahbarining hissiyotli murojaatini tarqatdik. Shu murojaatimiz ham ta'sir qildi. Bugunning o‘zida 8900ta ariza ariza egalari tomonidan qaytarib olindi», – dedi Davletov 1 aprel kuni «O‘zbekiston 24» telekanaliga bergan intervyusida.

Eslatib o‘tamiz, DXA direktori o‘z murojaatida «dostavshchik» sifatida BMW X7 va Mercedes kabi premium-klass avtomashinalarga ruxsat olishga ariza berayotgan «uddaburon, uchar» tadbirkorlarni insofga chaqirib, ular tufayli haqiqatan ham oziq-ovqat va dori-darmon mahsulotlarini yetkazib beruvchilar tegishli ruxsatnomasini o‘z vaqtida ololmayotganini aytgandi.

Adliya vaziri Ruslanbek Davletovning aytishicha, maxsus ruxsatnoma uchun kuniga 20-30 mingtadan ariza kelib tushmoqda.

«Davlat xizmatlari markazlarida 14ta hudud va Toshkent shahrining 11ta tumanlarida shu xizmatlar ko‘rsatilyapti. 24 soat ishlash tizimiga o‘tdik. Bizga kelib tushayotgan arizalar soni [kuniga] kamida 20-30 mingta bo‘lyapti. Bugungi kunga kelib, 102 mingta ariza kelib tushdi», – deya vazirning so‘zlarini keltirmoqda Kun.uz muxbiri.

Uning aytishicha, elektron tizim takomillashtirilgani natijasida 1,5 mingta ariza avtomatik tarzda rad etilgan.

«Elektron tizim shu darajada takomillashtirildiki, u tadbirkorlik sub'yektining kodlari to‘g‘ri kelmasa, avtomatik ravishda bekor qiladi. Bu degani bir kunda 20ta xodim qiladigan ishni tizimning o‘zi 5 daqiqada bajaryapti.

Kiritilgan arizalarning 1500tasi tizim yordamida avtomatik ravishda rad qilingan», – dedi Davletov.

Adliya vaziri shaxsiy transportdan foydalanish cheklovi faqat poytaxt shaharlar va viloyat markazlariga taalluqli ekaniga urg‘u berdi.

«Davlat tilida e'lon qilingan xabar internet resurslarida ruschaga tarjima qilinganida noto‘g‘ri ma'noda chiqqanini ko‘rdik. Bir narsani aniq aytib qo‘yishimiz kerak: birinchidan, bu – Toshkent shahri, Nukus shahri, viloyat ma'muriyat markazlariga taalluqli.

Boshqa tuman, shaharlaridagi hududlarga umuman taalluqli emas», – dedi Davletov.