«Ashxobod sayilgohi» aholi uchun 30 aprel kuni ochiladi

Toshkent shahrining Yashnobod tumani hududida barpo etilgan «Ashxobod sayilgohi» aholi uchun 30 aprel kunidan xizmat ko‘rsata boshlaydi. Bu haqda sayilgoh ma'muriyati «Kun.uz»ga ma'lum qilgan.

Uning alohida ta'kidlashicha, 23 aprel kuni Turkmaniston prezidenti Gurbanguli Berdimuhamedovning tashrifi munosabati bilan o‘tkazilgan marosim sayilgoh mijozlar uchun ochilganini anglatmaydi - sayilgohga faqat 30 aprel va undan keyingi kunlarda tashrif buyurish so‘raladi.

Kecha, 23 aprel kuni O‘zbekiston prezidenti Shavkat Mirziyoyev va Turkmaniston prezidenti Gurbanguli Berdimuhamedov ishtirokida ushbu sayilgohning ochilish marosimi o‘tkazilgandi. Shundan so‘ng, 24 aprel kuni shahar aholisi vakillari boqqa kelmoqda, ammo ular darvozadan qaytib ketishga majbur bo‘lishmoqda.

«Ashxobod sayilgohi»da qurilish ishlari aprel oyi boshida yakunlangandi. Ushbu sayilgohning umumiy maydoni 12 gektarni tashkil etadi. Bu yerda bitta 1180 metr kvadratni tashkil etuvchi usti yopiq inshoot ichida 26ta hamda 31 ochiq tipdagi o‘yin attraksionlari, nuroniylar maskani, muzqaymoq va salqin ichimliklar shoxobchalari qurilgan. Sayilgohga kiraverishda katta favvora barpo etilgan. Bog‘da xushmanzara daraxtlar, zamonaviy o‘rindiqlar va boshqa qulayliklar mavjud.

Zamonaviy madaniyat va istirohat bog‘i kiraverishda turkman millatining mardlik va jasorat timsoli bo‘lgan Axaltaka otlari haykallari o‘rnatilgan. Bu yerda qarag‘ay, qrim qarag‘ayi, hind sireni, eman, kashtan, magnoliya, arizona kiparisi, salviya, moviy archalar ekilgan.