Koʻchish paytida internet haqida odatda eng oxirida eslashadi: mebellar allaqachon joy-joyiga qoʻyilgan, bola esa onlayn darsga kirishi kerak. Shunda provayderni shosha-pisha, reklama yoki qoʻshnilarning maslahati bilan tanlashadi va keyin yillar davomida shu tanlovga koʻnikib yashashga majbur boʻlishadi. Uy internetini bir marta tanlab, keyin afsuslanmaslik uchun nimalarga eʼtibor qaratish kerakligini aytib beramiz.
1. Qachon ariza topshirish kerak?
Ulanish maʼlum vaqt talab qiladi. Provayder uyda oʻz tarmogʻi bor-yoʻqligini tekshirishi, siz bilan usta keladigan kunni kelishib olishi va mutaxassis yuborishi lozim. Yangi qurilgan uylarda baʼzan uzoqroq kutishga toʻgʻri keladi: uydagi tarmoq xonadon egalari kalitlarni olganidan keyinroq ishga tushishi mumkin.
Agar shartnoma tuzilib, toʻlov amalga oshirilgan boʻlsa, ariza berilgandan to internet ulangunga qadar oʻrtacha 1 kundan 5 ish kunigacha vaqt ketadi. Ariza qoldirishni narsalarni koʻchirib boʻlgandan keyinga qoldirmay, koʻchish sanasi aniq boʻlishi bilanoq amalga oshirgan maʼqul.
Agar sizda allaqachon internet boʻlsa, provayderdan uni yangi manzilga koʻchirish imkoniyati haqida soʻrab koʻring. Odatda bu yangi shartnoma tuzishdan koʻra osonroq kechadi.
2. Sizni qanday texnologiyaga ulashadi?
Kechqurun uyda hamma onlayn boʻlganida internetning qanday ishlashi aynan texnologiyaga bogʻliq boʻlsa-da, bu haqda kamdan-kam soʻrashadi.
Xonadongacha optika (GPON). Optik tola shundoqqina eshikkacha yetib keladi. Bunday ulanish bir vaqtning oʻzida koʻplab qurilmalar yuklamasini bemalol koʻtara oladi va zarurat tugʻilganda tezlikni oshirish imkonini beradi.
Uygacha optik tolali aloqa (FTTB). Optik tola binogacha yetib boradi, qavatlar boʻylab esa signal mis kabel orqali uzatiladi. Ishonchli ishlaydi, ammo butun podyezd tarmoqqa ulangan soatlarda tezlik pasayishi mumkin.
Telefon simi (ADSL). Uchta texnologiya ichida eng eskisi. Bitta kompyuter uchun u yetarli edi, biroq internetga oʻnlab qurilmalar ulangan xonadon uchun endi kamlik qiladi.
Yangi qurilayotgan uylarda optik tolali aloqa koʻpincha qurilish vaqtidayoq oʻtkaziladi. Quruvchi tashkilot yoki boshqaruv kompaniyasidan uyda qaysi provayderlar borligini va ular xonadonlarni qanday ulashini soʻrang.
