Qashqadaryoda gaz-zapravkada portlash sodir bo‘ldi

Hodisa “Kamaz” avtomobilidan gaz saqlash yomkostiga gaz quyish vaqtida sodir bo‘lgan. Portlashdan so‘ng kelib chiqqan yong‘in qariyb 1 soatda o‘chirilgan.

Qarshi tumanidagi avtomobillarga suyultirilgan gaz quyish shoxobchasida portlash sodir bo‘ldi. Holat yuzasidan Favqulodda vaziyatlar vazirligi matbuot xizmati xabar berdi.

Ma’lum qilinishicha, holat bugun soat 15:45 da Qarshi tumani Dasht mahallasi hududidan o‘tuvchi “G‘uzor-Qarshi” avtomobil yo‘lida joylashgan avtomobillarga suyultirilgan gaz quyish shoxobchasida kuzatilgan. “Kamaz-512” avtomobildan gaz saqlash yomkostiga gaz quyish vaqtida gaz-havo aralashmasining chaqnashi sodir bo‘lgan. Chaqnash oqibatida yong‘in yuzaga kelgan.

4 ta yong‘in-qutqaruv ekipaji soat 15:56 da hodisa joyiga yetib borgan hamda yong‘in soat 16:00 da o‘rab olinib, soat 16:45 da to‘liq o‘chirilgan. Yong‘in oqibatida shoxobcha binosining 22 metr kvadrat maydonda tom qismi yonib zararlangan.

Qayd etilishicha, hodisa oqibatida tan jarohati olgan va vafot etganlar yo‘q. Hozirda yong‘in sababi va moddiy zarar miqdori aniqlanmoqda.

#portlash #Qarshi tumani