Farg‘ona shahrida ko‘p qavatli uylar o‘rtasida barcha qurilishlar to‘xtatiladi 

13 fevral kuni Farg‘ona viloyati hokimi Xayrullo Bozorov Farg‘ona shahridagi «Do‘stlik» hamda «Gulzor» mahallalarida aholi yashash sharoitlarini o‘rgandi. Hokim hududda ko‘p qavatli turar joylar orasida yashil maydonlar hududidagi daraxtlar kesilgani, bolalar va sport maydonchalari buzilgani va o‘rniga yangi binolar qurilishi boshlanganini tanqid qilgan.

«Hududda yashovchi aholi viloyat hokimi bilan muloqot chog‘ida yangi qurilayotgan binolar sababli mahallada aholi yashashi uchun noqulayliklar tug‘dirayotganini, bolalar uchun ochiq havoda o‘ynashga, kattalar va keksalar uchun sayr qilishga imkoniyat qolmaganini bildirishdi.

Viloyat hokimi, birgalikda o‘rganish olib borayotgan shahar hokimi va prokuroriga bugundan e'tiboran Farg‘ona shahrida ko‘p qavatli turar joylar o‘rtasida olib borilayotgan barcha qurilishlarni to‘xtatish hamda bunday qurilishlarga ruxsat berish bilan bog‘liq qarorlarni bekor qilish yuzasidan topshiriq berdi. Poydevor uchun qazilgan kotlovanlar barchasi ko‘mib tashlanadi, qurilishi yakunlanish bosqichida bo‘lgan inshootlarning har birining qonuniyligi bo‘yicha shahar prokuraturasi o‘rganish olib boradi. Barcha hududlarda buzib tashlangan bolalar hamda sport maydonchalari qayta tiklanadi, qurilish egalari kesilgan har bir daraxt o‘rniga 100 tupdan manzarali daraxt ekishi ta'minlanadi. To‘xtatilgan qurilishlar o‘rniga tadbirkorlarga bino qurish uchun boshqa joydan yer maydoni taklif etiladi», deyiladi viloyat hokimligi matbuot xizmati xabarida.

Xayrullo Bozorov hududdagi atrof-muhit tozaligiga e'tiborsizlikka, chiqindilarning sochilib yotganiga, turar joylar atrofida obodonlashtirish ishlari umuman yo‘lga qo‘yilmaganiga, binolarga birikkan holda vaqtinchalik qo‘shimcha inshootlar qurib tashlanganiga alohida tanqidiy e'tibor qaratgan.

«Farg‘ona turar joy massivlarida fayz bo‘lishi shart», degan viloyat hokimi.

Shahar mahallalarini obodonlashtirish hamda ko‘kalamzorlashtirish bo‘yicha alohida manzilli dastur ishlab chiqish yuzasidan shahar hokimi Mirzohid Ubaydullayevga topshiriq berilgan.

Moturidiy ko‘chasi hududidan oqib o‘tuvchi katta ariq ustida insho etilgan obektlar olib tashlanib, suv qirg‘og‘i bo‘ylab velosiped minish hamda sayr qilish uchun ekoyo‘lak tashkil etiladigan bo‘lgan.