11:40 / 27.07.2017
26380

Yuridik universitet qabul komissiyasi abituriyentlarga soxta tibbiy ma'lumotnomalar sotilganini aniqladi

Joriy yilda Toshkent davlat yuridik universitetiga hujjat topshirgan ayrim abituriyentlar 086-U-shakl bo‘yicha soxta tibbiy ma'lumotnoma taqdim etgan. Bu haqida TDYuU qabul komissiyasi ma'lum qildi.

Aniqlanishicha, TDYuU qabul komissiyasi vakillari hujjatlarni sinchiklab o‘rganib chiqqanda o‘nlab abituriyentlar soxta tibbiy ma'lumotnomalar taqdim etayotgani ma'lum bo‘lgan. Soxta tibbiy ma'lumotnomalar original ma'lumotnomaning skanerlangan va rangli printerdan chop etilgan varianti bo‘lib, har bir abituriyentning rasmi alohida yopishtirilgan edi.

Abituriyentlar bilan bo‘lgan suhbatda, mazkur ko‘rinishdagi soxta tibbiy ma'lumotnomalarni 10 ming so‘mdan 20 ming so‘mgacha bo‘lgan miqdordagi haq evaziga sotib olishganligini ma'lum qilishgan.

Vazirlar Mahkamasining 2017 yil 20 iyundagi 393-sonli qarori bilan tasdiqlangan “Oliy ta'lim muassasalarining bakalavriatiga talabalarni o‘qishga qabul qilish tartibi to‘g‘risida”gi nizom talablariga ko‘ra, abituriyent tomonidan topshirilgan hujjatlarning qalbakiligi aniqlansa, u holda abituriyent test sinovlaridan (oliy ta'lim muassasasidan) chetlashtiriladi hamda hujjatlari o‘rnatilgan tartibda huquqni muhofaza qilish organlariga yuboriladi.

Mazkur qoidadan kelib chiqib, ushbu abituriyentlar test sinovlaridan chetlashtirildi va hujjatlar Yunusobod tuman IIBga yuborildi. Hozirda surishtiruv ishlari ketmoqda.
 

Top