O‘zbekiston Rossiya tomonidan urushga jalb etilgan fuqarolari haqidagi ma’lumotni o‘rganishni boshladi

O‘zbekistonning Kiyevdagi elchixonasi Ukraina tashqi ishlar vazirligiga Donetsk oblastidagi Rossiya qo‘shinlari safida o‘zbekistonliklar ham borligi to‘g‘risidagi ma’lumot yuzasidan so‘rov yubordi.

«Ukraina Qurolli Kuchlari Bosh shtabi tomonidan O‘zbekiston Respublikasi fuqarolarini Rossiya qo‘shinlari safiga ko‘ngilli sifatida majburan safarbar etilayotgani to‘g‘risida chop etilgan ma’lumot yuzasidan O‘zbekiston Respublikasining Ukrainadagi elchixonasi mazkur davlat Tashqi ishlar vazirligiga tegishli so‘rov yubordi.

Ushbu masala diplomatik vakolatxona tomonidan doimiy nazoratga olingan bo‘lib, Ukraina tomonidan yuqoridagi ma’lumot tasdiqlangan taqdirda, fuqarolarimiz manfaatlarini himoya qilish bo‘yicha kerakli barcha chora-tadbirlar ko‘riladi», deyiladi xabarda.

• Bundan oldinroq Ukraina qurolli kuchlari bosh shtabi Donetsk oblastining okkupatsiya ostidagi Horlivka shahrida joylashgan Rossiya bosqinchi kuchlari bo‘linmalarida O‘zbekiston fuqarolari borligi aniqlangani haqida xabar bergandi. Ular Ukraina chegarasini noqonuniy kesib o‘tib, qurilishda ishlash uchun Mariupolga kelgan. Lekin shundan so‘ng ularning pasportlari olib qo‘yilgan va ko‘ngillilar sifatida rus qo‘shinlariga safarbar qilingan.
• Keyinroq Ukrainaning Toshkentdagi elchixonasi O‘zbekiston fuqarolarini Rossiyaning ushbu davlatga qarshi urushida qatnashmaslik va Ukrainaning vaqtincha bosib olingan hududlariga bormaslikka chaqirdi.