00:03 / 18.03.2020
17520
Самарқанд коронавирус таҳдидида ҳар қандай ҳолатга шайми? Ҳоким ўринбосари жавоб берди

Коронавирус Ўзбекистонга кириб келганига уч кун бўлди. Бу вақт давомида одамлар вазиятга бироз кўниккандек. Самарқандда вирусга қарши қандай курашишмоқда? Шаҳар фавқулодда ҳолатга тайёрми? Бу саволларга Самарқанд вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Рустам Қобиловдан жавоб олдик.

Асосий вазифа вирус кириб келишининг олдини олиш

Вилоят ҳокими ўринбосари Рустам Қобиловнинг айтишича, вирус Ўзбекистонга кириб келгани эълон қилингач, Самарқандда ёппасига дезинфекция ишлари бошланган: «Вирус кириб келгани эълон қилингач, вилоят ҳокими бошчилигида фавқулодда комиссия тузилди. Вирус бизга кириб келгани йўқ, шу боис асосий вазифа у кириб келишининг олдини олиш. Биз аввало жамоат жойларини дезинфекция қилишни бошладик. Бугун бошқа вилоятдан келган охирги талабаларни уйларига жавоб бериб, университет ётоқхоналарини дезинфекциялаб ёпдик.

Дезинфекция билан шуғулланувчи санитария эпидемология марказида ходимлар етишмаслиги сабаб ҳар бир ташкилотда дезинфекция бўйича тушунтириш ўтказилди. Ҳар бир ташкилот мустақил тарзда дезинфекция ишларини олиб бормоқда. Масалан, Самарқандда меҳмонхона кўп. Шаҳарда уларнинг сони 154 та (уй меҳмонхоналаридан ташқари). Уларда ўз ходимлари томонидан дезинфекция ишлари олиб борилиб, бу ҳақда маълумот уч тилда ёзиб қўйилган.

Рустам Қобилов

Жамоат транспорти, автобуслар, йўналишсиз таксилар ҳам дезинфекция қилинмоқда. Айниқса автобуслар. Улар ҳар рейс охирида махсус суюқлик билан тозаланмоқда. Биласизми, Самарқанд тиббиёт институти талабалари кўнгилли тарзда дезинфекция ишларида қатнашмоқда».

Самарқанд фавқулотда ҳолатга тайёр

Вирус ҳали Самарқандга кириб келгани йўқ, аммо Қобилов раҳбарият бунга тайёрлигини айтди: «Бизнинг асосий мақсадимиз вирус кириб келишининг олдини олиш, лекин фавқулотга ҳолатга ҳам тайёрмиз. Вилоят ҳокими бугун «Дўстлик» ёзги оромгоҳида ташкил қилинган бошқа мамлакатлардан Самарқандга тўғридан-тўғри кириб келган фуқаролар карантинга олиш учун махсус жойни бориб кўрди. Фавқулотда ҳолат учун захирамиз етарли, техникалар бор.

Тўғри, бундай ҳолатга биринчи марта дуч келяпмиз, лекин ишлар одатдагидек давом этмоқда. Албатта, ҳамма раҳбарлар коронавирусдан сақланишни асосий вазифа сифатида қарамоқда, бироқ бошқа ишлар ҳам қолиб кетаётгани йўқ. Тўғриси, вазият ваҳима қиладиган даражада эмас».

Рустам Қобиловнинг айтишича, коронавирус ваҳимаси пайдо бўлгач, бошқа юқумли касалликлар камайди: «Самарқандда коронавирус ваҳимаси пайдо бўлганидан сўнг бошқа юқумли касалликларга чалиниш 37% камайди, чунки одамлар гигиенага эътибор беришни бошлади».

Ҳоким ўринбосари Самарқанддаги дорихоналарда тиббиёт ниқобларининг етишмовчилиги ҳақида ҳам гапирди: «Ҳа, ниқоблар етишмаётгани рост. Ҳозирда 4 та корхона ниқоб ишлаб чиқариш бўйича таклиф берди. Биз уларнинг маҳсулотини кўриб, ниқоб сифатида фойдаланиш мумкин деган хулосага келдик ва ишлаб чиқаришга рухсат бердик. Умид қиламан, тез орада бу муаммо ҳал бўлади».

Қобиловнинг айтишича, 7-10 кун ичида тадбиркорлик фаолияти ўз ўрнига тушади: «Албатта, вирус хавфи тадбиркорлик фаолиятига тўсиқ бўлади. Бу эса иқтисодиётга таъсир қилмай қўймайди. Менимча, 7-10 кун ичида ҳаммаси яна ўз изига тушади».

Ўткир ЖАЛОЛХОНОВ суҳбатлашди
Тасвирчи ва монтажчи: Фахриддин ҲОТАМОВ

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top