Gulnora Karimovadan musodara qilingan «Sijjak» oromgohi sotuvga qo‘yildi

Davlat aktivlarini boshqarish agentligi prezident farmoniga muvofiq xususiylashtirilishi belgilangan 8 ta davlat obektini ommaviy savdoga chiqardi.

Aktivlarning 5 tasi Toshkent shahrida joylashgan. Ular quyidagilar:

• «Poytaxt» biznes majmuasi. 14 qavatli bino, maydoni 34 ming kvadrat metr. Binoda xalqaro konferensiyalar va biznes forumlar o‘tkazish mumkin.
• «Gazetalar ishlab chiqarish majmuasi» binosi. 1,2 gektar yer maydoniga ega. Undan ma’muriy bino va ofis sifatida foydalanish mumkin.
• «Ma’muriy bino» (Sobiq Respublika birja markazi). Umumiy maydoni 1,1 gektar. Binoda savdo, xizmat ko‘rsatish va tomosha konsert faoliyatini yo‘lga qo‘yish mumkin.
• «Malika» savdo va maishiy xizmat ko‘rsatish majmuasi. Yer maydoni 4,1 gektar. Majmuada 120 dan ziyod tadbirkorlik sub’yekti va savdo markazi faoliyat olib bormoqda.
• «Ichan qal’a» mehmonxona majmuasi. Yer maydoni 0,6 gektar. Otelda 58 ta xona hamda 5 ta alohida kottejlar bor.

Qolgan 3 ta davlat aktivi Toshkent viloyatida joylashgan bo‘lib, ular yil davomida ishlaydi va tayyor biznes shaklida investorlarga taklif etilmoqda.

• «Beldirsoy» dam olish maskani. Yer maydoni 46,1 gektar. Oromgoh 78 o‘ringa mo‘ljallangan mehmonxona va 16 ta kottejdan iborat.
• «Qizil suv sport sog‘lomlashtirish» MChJ. Yer maydoni 5,9 gektar. 110 kishilik 8 ta kottej, konferens zal, mini futbol maydonchasi, suzish havzalari bor.
• «Sijjak» dam olish maskani. Yer maydoni 5,4 gektar. Restoran, kinoteatr, qishki bog‘, bar, sauna, sport zallari, ochiq va yopiq suv inshootlari, kottejlarni o‘z ichiga oladi.

Ma’lumot uchun, Bo‘stonliqdagi «Sijjak» oromgohi birinchi prezidentning qizi Gulnora Karimovaga tegishli bo‘lgan, 2017 yil fevralida sud ajrimi bilan musodara qilingan edi. Keyinchalik bu maskan Triatlon federatsiyasiga vaqtincha tekin foydalanishga berilgandi.

Sotuvga qo‘yilgan 8 ta obektni Davaktiv saytidagi «Virtual ko‘rish 360» formati orqali ko‘rish mumkin.

Xarid uchun takliflar 2021 yil 30 aprelga qadar qabul qilinadi.