«O‘zgidromet» 3–7 iyun kunlari O‘zbekistonga Eron hududlaridan issiq havo massalari kirib kelishi, havo haroratining keskin ko‘tarilib ketishi va o‘rtacha sutkalik havo haroratining shu kunlar uchun xos bo‘lgani iqlimiy me'yor qiymatlaridan 7-10 daraja yuqorilashi to‘g‘risida ma'lum qilgandi.
Qayd etilishicha, shu kunlari kuzatilgan harorat uch asr avvalgi rekorddan yuqori bo‘ldi.
«Toshkent shahrida 2021 yil 3-7 iyun kunlari shu kun uchun rekord issiq havo haroratlari qayd etildi. Toshkent shahrida 3-7 iyun kunlari kuzatilgan maksimal havo harorati deyarli o‘tgan asr boshlari va 19 asr oxirlarida ushbu kunlarda qayd etilgan maksimumlarni yangiladi. Toshkent shahrida kuzatuvlar tarixida qayd etilgan eng yuqori havo harorati +44,6 darajaga yetgan bo‘lib, bu ko‘rsatkich 1997 yil 18 iyulda kuzatilgan», deyiladi «O‘zgidromet» xabarida.
2021 yil 6 iyun kuni harorat 42,6 daraja issiq bo‘ldi. Bunga qadar shu kundagi yuqori harorat 1811 yilda qayd etilgan va 38,5 daraja issiq bo‘lgan. 7 iyun kuni esa harorat 40,8 darajagacha ko‘tarildi. Unga qadar shu kundagi maksimal ko‘rsatkich 1894 yilda kuzatilgan va 39,7 daraja issiq bo‘lgan. O‘zbekistonda 31 maydagi harorat ham mutlaq maksimumga yetgandi.
