Toshkentdagi ko‘chalardan biri 5 oyga yopiladi

Toshkent shahri Olmazor tumanidagi Qorasaroy ko‘chasida transport vositalari harakati vaqtincha to‘xtatiladi. Bu haqda poytaxt hokimligi matbuot xizmati xabar berdi.

Qayd etilishicha, ushbu ko‘chada 2 apreldan boshlab sentabr oyigacha qurilish-ta’mirlash ishlari olib boriladi.

Ko‘chaning yopiladigan qismi: Abdulla Qodiriy ko‘chasi bilan kesishgan joydan Nurafshon ko‘chasi bilan kesishgan joygacha.

«Vaqtinchalik noqulayliklar uchun uzr so‘raymiz va haydovchilarga muqobil yo‘nalishlardan foydalanib, o‘z yo‘llarini oldindan rejalashtirish tavsiya etiladi», — deyiladi xabarda.

Avvalroq Shayxontohur tumanidagi Shofayzi ko‘chasi 25 martdan 1 mayga qadar avtomobillar harakati uchun yopilgani to‘g‘risida xabar berilgandi.