Bugun, 17 sentabr kuni, Qirg‘iziston Qurolli kuchlarining harbiy-transport samolyoti bortida o‘n nafar kishi yaralangan holda Bishkekka olib ketildi. Bu haqda Knews Qirg‘iziston Chegara xizmatiga tayangan holda xabar bermoqda.
Ma'lumotlarga ko‘ra, Qirg‘iziston poytaxtidagi tibbiy muassasalarda yaralangan fuqarolarga zarur yordam ko‘rsatiladi.
16 sentabr kuni davlat chegarasining qirg‘iz-tojik qismida ro‘y bergan otishma chog‘ida 13 nafar kishi turli darajada tan jarohatlari olgan, ulardan 10 kishi Bishkekka davolanish uchun yuborilgan, deyiladi xabarda.
O‘z navbatida, ushbu hodisa oqibatida Tojikiston tomonidan qancha kishi yaralangani haqida hozircha aniq ma'lumot yo‘q.
Avvalroq, birinchi bo‘lib tojik tomoni Qirg‘izistonning "Maksat" chegara posti, so‘ngra "Say" chegara posti tomon o‘q uzgani ma'lum qilingandi.
Hodisaga Tojikiston fuqarolari davlat chegarasining belgilanmagan uchastkasida qurilish ishlarini boshlashlari sabab bo‘lgan. Bunga javoban Qirg‘iziston fuqarosi xuddi o‘sha joyda uyi atrofiga devor urishni boshlagan.
«19.30larda tojik harbiylari Qirg‘iziston fuqarosidan agressiv tarzda qurilishni to‘xtatishni talab qilishgan, o‘rtada dahanaki jang kelib chiqqan va otishmaga aylangan», - deyiladi Qirg‘iziston chegara xizmati tomonidan.
