Vaqtincha ishsizlarga tomorqadan foydalanish uchun subsidiyalar ajratiladi - Vazirlik

Bandlik va mehnat munosabatlari vazirligi matbuot kotibi Shahnoza Ravshanova AOKAda o‘tkazilgan brifingda aholi bandligiga ko‘maklashish markazlari orqali tomorqadan foydalanish uchun subsidiyalar olish mumkinligi haqida ma'lum qildi.

«Buning uchun, dastlab, Aholi bandligiga ko‘maklashish markazi tomonidan fuqaroning bandligi va tomorqa yer maydoni o‘rganib chiqiladi. So‘ng unga yengil konstruksiyali issiqxonalar o‘rnatish, ko‘chat va urug‘lik yoki sug‘orish  vositalari xarid qilishi uchun «Tomorqa xizmati» MChJ, Aholi bandlikka ko‘maklashish markazi va tomorqa yer egasi tomonidan 3 tomonlama shartnoma tuziladi», deya uning so‘zlarini keltirmoqda Kun.uz muxbiri.

Shahnoza Ravshanovaning ta'kidlashicha, mana shu asosda fuqaroga bazaviy hisoblash miqdorining 3 baravaridan 10 baravarigacha bo‘lgan miqdorda subsidiya ajratiladi.

«Subsidiya bu – beg‘araz yordam va uni qaytarish talab etilmaydi. Bunday turdagi subsidiyalarni fuqarolar faqat issiqxona qurish uchun emas, balki urug‘lik, ko‘chat sotib olish uchun ham ishlatishi mumkin», dedi Shahnoza Ravshanova.

Uning qo‘shimcha qilishicha, aprel oyining o‘zida ishsiz va band bo‘lmagan fuqarolarga yengil konstruksiyali issiqxonalar o‘rnatish, urug‘lik va ko‘chatlar xarid qilish uchun 20 ming shaxsiy tomorqa uchun 35,4 milliard so‘m miqdorida subsidiya ajratiladi.

Shuningdek, agar subsidiya olishda muammolar bo‘lsa, vazirlikning (+71) 200-06-00 raqamiga murojaat qilish so‘raladi.