O‘zbekiston Afg‘onistonga qariyb 100 tonna insonparvarlik yordami yubordi - Fotoreportaj

O‘zbekiston tarafi yuborgan yordam tarkibida oziq-ovqat mahsulotlari: un, bug‘doy, yog‘, makaron, go‘sht mahsulotlari, guruch, shakar; chodir va odeyallar, shuningdek birlamchi tibbiy yordam uchun zaruriy barcha vositalar bor.

Insonparvarlik yordami O‘zbekiston prezidentining Afg‘oniston bo‘yicha maxsus vakili Ismatilla Irgashev boshchiligida yetkazildi. Tadbirda, shuningdek OAV vakillari ham qatnashdi.

O‘zbekiston delegatsiyasini Afg‘oniston hukumati tomonidan tuzilgan zilzila oqibatlarini bartaraf qilish bo‘yicha komissiya raisi Mavlaviy Sharofiddin Muslim, rais o‘rinbosari Ahmadullo Muttaqiy hamda Transport va fuqaro aviatsiyasi vaziri o‘rinbosari Abdul Sattor Gurvollar kutib oldi.

“O‘zbekiston – bizga har doim birinchilardan bo‘lib yordam qo‘lini cho‘zib kelgan birodar mamlakat. Men o‘zim bir necha bor mamlakatingizdan keladigan ko‘makni qabul qilib, jabr ko‘rgan xalqimiz o‘rtasida taqsimlashda ishtirok etganman. Biz Afg‘oniston Islom Amirligi hukumati va xalqi nomidan O‘zbekiston prezidenti Shavkat Mirziyoyev va xalqiga chuqur minnatdorligimizni bildiramiz. Sizlar eng yaxshi qo‘shnimiz sifatida Alloh yuborgan og‘ir sinov kunlarida har doim yonimizda turasiz. Buni hech qachon bizni xalqimiz esidan chiqarmaydi”, – deya Mavlaviy Sharofiddinning so‘zlarini keltirmoqda Kun.uz muxbiri.

Abdul Sattor Gurvolning Kun.uz muxbiriga aytishicha, zilzila oqibatlarini bartaraf qilish uchun hukumat komissiyasi ishlamoqda. Shuningdek, birinchi navbatda bemorlar va uyi buzilganlar uchun yordam berilmoqda. Bugunga qadar Afg‘onistonga BAAdan humanitar yordam yetib kelgan, shuningdek Turkiyadan ham yordamlar yetib kelishi kutilmoqda.

Olingan ma’lumotlarga ko‘ra, bugungi kunda Afg‘oniston muvaqqat hukumati bosh-vazirining birinchi o‘rinbosari Mulla Barodor boshchiligidagi hukumat vakillari Hirot viloyatiga tashrif buyurib, qo‘shimcha zarur bo‘lgan yordam ko‘lamini aniqmoqda.

Eslatib o‘tamiz, 7 oktyabr kuni ertalab Afg‘onistonda fojiali tabiiy ofat yuz berdi: episentri Hirot shahridan 40 km shimoli g‘arbda 6,2 magnitudali zilzila sodir bo‘ldi. Zilziladan so‘ng 3 ta kuchli aftershok kuzatilgan.

Ba’zi ma’lumotlarga kura, kuchli zilzila oqibatida halok bo‘lganlar soni 2400 dan oshgan, vayronalar ostida qolayotgani sababli qurbonlar soni yanada oshishi mumkin. Shuningdek, 10 dan ortiq kichik aholi punktlarida 600 dan ortiq uylar vayron bo‘lgan yoki qisman shikastlangan. 10 mingdan ortiq inson turli darajada jarohatlangan.