Bosh prokuratura huzuridagi departamentning Navoiy viloyat boshqarmasi tomonidan tergovga qadar tekshiruvlar o‘tkazilgan.
Iqtisodiy jinoyatlarga qarshi kurashish departamenti xabariga ko‘ra, Navoiy shahrida faoliyat yurituvchi “Sh.B.” hamda “N.G.” MChJga qarashli ohak ishlab chiqarish sexlarida o‘rnatilgan gaz hisoblash uskunasi ko‘rsatkichlarini o‘zgartirish maqsadida tashqaridan qasddan shikast yetkazilib (1,5 mm hajmda teshik hosil qilish orqali), tabiiy gazdan noqonuniy foydalanilgani natijasida, hududiy gaz ta'minoti korxonasi manfaatlariga “Sh.B.” MChJ tomonidan 985,7 mln so‘m va “N.G.” MChJ tomonidan 130,2 mln zarar yetkazilgani aniqlangan.
Hisob-kitoblarga ko‘ra, noqonuniy foydalanilgan tabiiy gaz 1 oy davomida 1 858ta xonadonni uzluksiz tabiiy gaz bilan ta'minlashga yetishi ma'lum bo‘lgan.
Mazkur holatlar yuzasidan Jinoyat kodeksining 185-2-moddasi (gazdan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
