Forbes nashri dunyoning eng badavlat odamlarining yangi reytingini e'lon qildi. O‘tgan yildagi kabi reytingga Amazon asoschisi Jyeff Bezos yetakchilik qilmoqda.
Reyting 34-marta e'lon qilinmoqda.
Bezos bir yil ichida 18 mlrd dollarga “kambag‘allashgan” bo‘lsa-da, ro‘yxatda 12 ta raqamli boylikka ega yagona odam hisoblanadi. Fevraldan beri unga qarashli Amazon kompaniyasi aksiyalari AQSh fond birjasi bilan birga 20 foizga qulagan. Hozirda uning aktivlari 113 mlrd dollarga baholanmoqda.
Reytingning 2-o‘rnini 2019 yildagi kabi Microsoft asoschisi Bill Geyts 98 mlrd dollarlik boylik bilan egallamoqda. 3-o‘rinni LVMH kompaniyalar guruhi egasi Bernar Arno va uning oilasi egallamoqda. Fransuz tadbirkorining boyligi hozirda 76 mlrd dollarga baholanmoqda.
Yetakchi o‘ntalikdan, shuningdek, amerikalik sarmoyachi Uorren Baffet (67,5 mlrd dollar), Oracle dasturiy ta'minot kompaniyasi asoschisi Larri Ellison (59 mlrd dollar), Inditex kompaniyasi egasi Amansio Ortega (55,1 mlrd dollar), Facebook asoschisi va bosh direktori Mark Tsukerberg (54,7 mlrd dollar), Walmart kompaniyasi aksiyadori Jim Uolton (54,6 mlrd dollar), Walmart’ning yana bir aksiyadori Elis Uolton (54,4 mlrd dollar) va Uoltonlar oilasining yana bir vakili Rob Uolton (54,1 mlrd dollar) joy olgan.
Umuman olganda ro‘yxatga 2095 milliarder kiritilgan. Bu esa 2019 yilga nisbatan 58 kishiga va joriy mart oyiga nisbatan 226 kishiga kamroqni tashkil qiladi.
Barcha milliarderlarning umumiy boyligi 8 trln dollarni tashkil qilgan. Bu 2019 yilga nisbatan 700 mlrd dollar kamroqni tashkil qiladi. Reytingga 178 nafar yangi milliarder kiritilgan.
Reytingning yetakchi yigirmataligidan joy olgan milliarderlarning umumiy boyligi 1,14 trln dollarni tashkil qiladi. Milliarderlar soni bo‘yicha AQSh yetakchilik qilmoqda (614 kishi), 2-o‘rinni Xitoy (389 kishi) va 3-o‘rinni Germaniya (107 kishi) egallamoqda.
