Vazirlar Mahkamasining 7 iyun kungi 468-sonli qarori asosida Oliy ta'lim muassasalariga o‘qishga kirish uchun hujjatlarni qabul qilish bo‘yicha davlat xizmatlarini ko‘rsatishning ma'muriy reglamenti tasdiqlandi.
Unga ko‘ra, ayrim OTMlarga (ularning soni 5ta) hujjat topshirish Davlat xizmatlari markazi va Yagona portal orqali amalga oshiriladigan bo‘ldi.
Huquqshunos va bloger Xushnudbek Xudayberdiyev mazkur qarorda ko‘pchilik e'tibor qilmaydigan «bir ayyorlik o‘tib ketgani» haqida yozdi.
«Qarorning 11-bandida avvalgi yillarda tugatgan abituriyentlardan hujjat qabul qilishda EKIHning yarim baravari (101365 so‘m) miqdorida to‘lov undirilishi belgilangan.
Shu bandning o‘zida mazkur to‘lovlar Davlat test markazi faoliyatini rivojlantirish jamg‘armasiga yo‘naltirilishi aytilgan. Ha, bu yangilik emas, bu haqida avvalroq PQ-4319-sonli Prezident qarorida ham aytilgan edi.
Bir qarashda hammasi joyidadek. Ammo qarorga ilova qilingan Reglamentda abituriyentlarni syurpriz kutib turibdi.
Reglamentning 11-bandida davlat xizmati ko‘rsatilgani uchun avvalgi yilda tugatgan abituriyentlardan EKIH 50 foizi (101 ming 365 so‘m) miqdorida to‘lov olinishi belgilangan.
Bu pulning 50 foizi Adliya vazirligi huzuridagi jamg‘armaga, 10 foizi Ichki ishlar vazirligining jamg‘armasiga, qolgan mablag‘lar davlat budjetiga o‘tkazilishi ta'kidlangan.
Nima bo‘lganini tushundingizmi? Demak, bundan chiqdi, TDYuU, QDU, SamDU, FarDU va GulDUga hujjat topshirmoqchi bo‘lgan hamda o‘qishni avvalgi yillarda tugatgan abituriyentlar 2 marta to‘lov qiladi:
1) DTM jamg‘armasiga o‘tadigan 101 ming so‘m;
2) Adliya, Ichki ishlar va davlat budjetiga o‘tadigan yana alohida 101 ming so‘m.
