O‘zbekistonning 23 ta oliygohi Osiyo universitetlari reytingiga kirdi

Osiyodagi eng yaxshi universitetlarning yangi reytingiga O‘zbekistonning 23 ta oliygohi kirdi. Biroq, ulardan hech biri yuqori yuztalikdan joy olmadi. Bu haqda QS Asia University Rankings 2025 ma’lumotlaridan oydinlashmoqda.

Osiyoning 25 ta mamlakatidagi 985 ta oliy ta’lim dargohi reytingga kiritilgan. Oliygohlar tadqiqot va ixtirolar, ta’lim berish tajribasi (talabalar va o‘qituvchilar soni nisbati, doktorlik darajasiga ega o‘qituvchilar), global hamkorlik (xalqaro tadqiqot tizimi, xorijlik talabalar, xalqaro fakultetlar), ishga joylashtirish, ingliz tili va boshqa akademik test natijalari kabi kriteriyalar asosida baholangan.

Eng yaxshi oliy ta’lim dargohi sifatida Xitoyning Pekin universiteti qayd etildi. Ushbu oliygoh 100 ball to‘pladi. Yuqori beshlikdan Hongkong universiteti, Singapur milliy universiteti, Nanyang texnologiya universiteti (Singapur) va Fudan universiteti (Xitoy) ham joy oldi.

Reytingga O‘zbekistonning 23 ta oliy ta’lim dargohi kiritildi, ammo ulardan hech biri yuqori yuztalikdan joy olmadi. Eng yaxshisi sifatida Toshkent irrigatsiya va qishloq xo‘jaligini mexanizatsiyalash muhandislari instituti qayd etilgan. Ushbu oliygoh reytingda 44,9 ball bilan Osiyoda 159-o‘rinni, Markaziy Osiyoda 7-o‘rinni egalladi.

Umuman olganda, 23 ta oliygohdan faqat to‘rttasi reyting ballarini to‘plashga erishgan xolos. Jumladan, O‘zbekiston Milliy universiteti 34,5 ball bilan 242-o‘rinda, Toshkent davlat iqtisodiyot universiteti 25,7 ball bilan 359-o‘rinda, Toshkent davlat texnika universiteti 25,5 ball bilan 368-o‘rinda qayd etilgan.

Reytingda Qozog‘istonning 35 ta oliygohi qayd etildi. Ulardan oltitasi Markaziy Osiyoda yetakchi o‘rinlarni egallab turibdi.

Shuningdek, reytingga Qirg‘izistonning 6 ta oliygohi, Tojikistonning 1 ta oliygohi kiritildi. Turkmanistonning birorta oliygohi reytingdan joy olmadi.