Давлат активларини бошқариш агентлиги директори Соҳибжон Муродов 8 октябр кунги матбуот анжуманида Ўзбекистондаги энг йирик саноат лойиҳаларидан бири — Uzbekistan GTL заводини хусусийлаштириш ҳақидаги саволга жавоб берди.
Президентнинг 2025 йил 21 апрелдаги ПҚ–145-сонли қарори билан давлат иштирокидаги 29 та йирик корхона акциялари ва улушларини халқаро ҳамда маҳаллий бозорларда оммавий савдога чиқариш белгиланган. Улар қаторига “Ўзбекнефтгаз” АЖга тегишли “Uzbekistan GTL” МЧЖ ҳам киритилган.
Ҳужжатга мувофиқ, Uzbekistan GTL устав капиталидаги 100 фоиз улушни сотиш бўйича профессионал маслаҳатчиларни 2025 йилнинг учинчи чорагида жалб этиш, оммавий савдони эса 2026 йилнинг иккинчи чорагида эълон қилиш режалаштирилган.
Бироқ белгиланган муддат ўтганига қарамай, корхонанинг хусусийлаштирилиши бўйича савдо жараёни қайси босқичдалиги ҳақида жамоатчиликка батафсил ахборот берилмаган.
Анжуманда Uzbekistan GTL йирик қарз маблағлари эвазига қурилгани эслатилиб, заводнинг ҳозирги молиявий кўрсаткичлари, кредит мажбуриятлари ва қарзларнинг қанчаси қоплангани ҳақида ҳам савол берилди. Шунингдек, корхона хусусийлаштириладиган тақдирда унинг мавжуд қарз мажбуриятлари қандай ҳал қилинишига аниқлик киритиш сўралди.
Давактив агентлиги директори Соҳибжон Муродовнинг билдиришича, Uzbekistan GTL’ни хусусийлаштириш бўйича концепция ишлаб чиқилган ва жараёнга тайёргарлик ишлари бошланган.
“GTL’ни хусусийлаштириш бўйича бизда концепция бор. Уни хусусийлаштириш босқичи қайсидир маънода бошланган.
Хусусийлаштириш шу муддатда амалга оширилади дегани, корхона айнан ўша муддатда сотилади дегани эмас. Бу хусусийлаштириш бўйича ишлар бошланишини англатади.
Хусусийлаштиришгача бўлган жараёнлар бор. Корхонанинг молия-хўжалик фаолиятини аудитдан ўтказиш, унинг хўжалик ёки молиявий фаолиятига салбий таъсир қилаётган омиллар бўлса, уларни бартараф этиш керак.
Шунингдек, хусусийлаштиришдан кейин унинг иқтисодиётга, у билан ишлайдиган ҳамкор ташкилотларга, маҳсулот етказиб берувчилар ёки товар олувчиларга қандай таъсир қилиши ҳам таҳлил этилади. Биз ҳозир айнан шу босқичдамиз.
IPO бўйича ҳам ишлар бошланган. IPO’да иштирок этишга қизиқиш билдирган йирик халқаро ташкилотлар бор. Улар бизга мурожаат қилиб, қачон IPO ўтказасизлар, биз ҳам унда иштирок этмоқчимиз, деб сўрашган. Бу биз учун яхши сигнал. Яъни IPO’га чиқадиган бўлсак, GTL’нинг кичик улушдаги акцияларини сотиб олишга қизиқувчилар ҳам бўлади.
