АҚШ президенти Доналд Трамп Украина президенти Володимир Зеленский АҚШ ва бутун дунё учун муаммо келтириб чиқаришни истаётганини айтди.
«У бизнинг фермерларимизга дизел ёнилғиси билан боғлиқ муаммолар келтириб чиқаришни хоҳламоқда, чунки Россия бутун дунёга дизел ёнилғисининг катта қисмини етказиб беради», — деди АҚШ президенти Эндрюс базасида ўтказилган брифингда.
Трампнинг сўзларига кўра, АҚШ Украинадан Россия нефт заводларига зарба бермасликни сўраган, лекин Зеленский «ўзи истаганидек йўл тутмоқда».
«Унга хоҳлаганингни қил, фақат нефтни қайта ишлаш заводларига зарба берма деганман. У бу ишни бас қилиши керак», деди у.
Шунингдек, Трамп Украинага янги президент кераклигини айтди.
«Мен келишув туза оладиган янги раҳбар топишни таклиф қиламан. Чунки у [Зеленский] кўплаб келишувлар тузиши мумкин эди, лекин негадир бундай қилмаяпти», деди АҚШ президенти.
9 октябр куни АҚШ президенти Россия раҳбари билан телефон мулоқотини ўтказди. Трамп суҳбатдан сўнг Россия Америка ва глобал бозорга яқин муддат ичида жами 3 миллион тонна дизел етказиб беришини маълум қилди.
Ўз навбатида Украина президенти Володимир Зеленский АҚШнинг Россия дизел ёнилғисини жаҳон бозорига етказиб беришга рухсат бериш қарорини «урушга инвестиция» деб атади.
