«У сизнинг президентингизни жуда ҳурмат қилади» – Трампнинг махсус вакили Шавкат Мирзиёев ҳақида

АҚШ президентининг Жанубий ва Марказий Осиё бўйича махсус вакили Сержио Горнинг 22 сентябр куни БМТ Бош ассамблеяси 80-юбилей сессияси тадбирлари доирасида Ўзбекистон президенти Шавкат Мирзиёев билан учрашувидан кейин тадбирни ёритиш учун Ню Йоркда бўлиб турган ўзбекистонлик журналистлар уни саволга тутишди.

Хусусан, ундан Доналд Трампнинг Ўзбекистондан кутилмалари қандай экани ҳамда Шавкат Мирзиёев билан учрашув қандай ўтгани ҳақида сўралган.

«Айтмоқчиманки, президент сизнинг президентингиз билан шу ой бошида гаплашганди. У ўзининг самимий саломини етказишимни сўради. У сизнинг президентингизни жуда ҳурмат қилади.

Бугун кўрганимиздек, президентингиз ҳақиқий натижалар кўрсатмоқда. АҚШдаги энг йирик компаниялар Ўзбекистон билан ажойиб битимлар имзолади. Бу президентингиз раҳбарлиги ва бизнинг президентимизнинг ҳамкорликка тайёрлигидан  далолат беради.

Шунинг учун биз бу борада ишлашни интиқлик билан кутамиз», дея унинг сўзларини келтирмоқда Mikrofon ko‘targan ayol телеграм-канали.

Kun.uz мухбирининг бугунги учрашувда Ўзбекистон президенти билан қайси мавзулар муҳокама қилингани тўғрисидаги саволига у шундай жавоб қайтарган:

«Муносабатларни, ҳамкорликни кучайтириш, бизнес ва хавфсизлик масалалари. Биз кўп масалаларни муҳокама қилдик. Сизнинг ажойиб президентингиз Оқ уйда илиқ кутиб олинди. Президентимиз у билан мулоқот қилишни интизорлик билан кутмоқда».