АҚШ давлат котиби Америка-Ўзбекистон ишбилармонлик ва инвестиция кенгашининг иккинчи йиғилиши очилишида сўзлаган нутқида Доналд Трамп бошқаруви даврида АҚШ ва Ўзбекистон ҳамкорлиги кенгайиб бораётгани ҳақида гапирди ва бунда президент Шавкат Мирзиёевнинг ислоҳотлари муҳим бўлганини эътироф этди.
«Биз анча олдинроқ ва кенгроқ миқёсда ҳамкорликни йўлга қўйишимиз керак бўлган минтақалардан бири – Марказий Осиё, хусусан, Ўзбекистон эди.
Мени қувонтирадиган жиҳати шундаки, бу вазият тахминан 10 йил олдин ўзгара бошлади ва президент Трамп раҳбарлигида жараён сезиларли даражада жадаллашди. Президент Трамп ушбу муносабатларга устувор аҳамият қаратди. У ўтган йили Оқ уйда саммит ўтказиш орқали бу йўналиш қанчалик муҳимлигини намойиш этди. Шунингдек, ўзи катта ишонч билдирадиган Сержио Горни Марказий Осиё бўйича махсус вакили этиб тайинлади.
Умид қиламанки, менинг бугунги ташрифим ҳам ушбу минтақа биз учун қанчалик устувор эканини кўрсатади. Бундан ҳам муҳими, жорий йил охирида Қўшма Штатларда бўлиб ўтадиган G20 йиғилишига минтақанинг бир қатор давлатлари, жумладан, Ўзбекистон ҳам кузатувчи сифатида таклиф этилмоқда», дейди АҚШ давлат котиби.
У Америка ва минтақа ҳамкорлигини мустаҳкамлаш ва кенгайтиришга қаратилган ишлар давом эттирилишини маълум қилган.
«Ҳеч кимда шубҳа бўлмасин. Қўшма Штатлар ушбу минтақанинг ҳам, Ўзбекистоннинг ҳам ҳамкори бўлишни истайди. Биз аллақачон ҳамкормиз ва бу ҳамкорликни янада мустаҳкамлаш ва кенгайтириш ниятидамиз.
Бугунги кун – бу йўлдаги катта қадамдир. Ишонаманки, 5-6 йилдан кейин одамлар Американинг Ўзбекистон билан муносабатлари қандай ривожланганини таҳлил қилганида айнан бугунги оқшомни эслашади.
Америка бизнеси ва президент Шавкат Мирзиёев ислоҳотларини. Улар бугун шу ерда йиғилган барчангизни, Қўшма Штатлардан узоқ йўл босиб келган 200 нафардан ортиқ ишбилармонларни эслашади.
Бунга кўникинг. Чунки бу ҳамкорлик тобора кенгайиб боради. Балки бу ердан квартира ёки кичикроқ уй сотиб олишингиз керак бўлар. Чунки энди Ўзбекистонга тез-тез келишингизга тўғри келади. Биз бунга умид қиламиз.
Сиз амалга оширган ислоҳотларингизсиз буларнинг имкони бўлмасди, жаноб президент. Сиз мамлакатингизни дунёга очдингиз. Энг муҳими, Қўшма Штатлар ва президент Трампни ҳамкор сифатида қабул қилдингиз. Натижада сиз нафақат ўз мамлакатингиз, балки бутун минтақа ва Қўшма Штатлар учун ҳам биргаликда ривожланиш бўйича улкан имкониятлар яратдингиз», деган АҚШ давлат котиби.
