Калифорния Жанубий округи федерал суди АҚШ Давлат департаментига DV-2027 грин-карта лотереясини ўтказиш мажбуриятини юклади, деб хабар берди Courthouse News Service.

14 октябрь куни судья Жинсук Ота дастурга рўйхатга олиш кечиктирилгани сабабли давлат котиби Марко Рубиога қарши даъво киритган Red Eagle Law юридик фирмасининг илтимосномасини қаноатлантирди. Давлат департаментига ариза топшириш муддатларини эълон қилиш, рўйхатга олишни бошлаш ва саралаб олинган иштирокчиларнинг аризаларини кўриб чиқиш мажбурияти юклатилди.

«Эълонда рўйхатга олишнинг бошланиш ва якунланиш санаси, электрон аризаларни топшириш сайти ҳамда иштирокчиларга қўйиладиган талаблар кўрсатилиши шарт», – дейилади қарорда.

Суд қарорига кўра, Давлат департаменти қуйидагиларни амалга ошириши шарт:

  • 1 ноябрдан кечиктирмай DV-2027 учун рўйхатга олишни бошлаш;

  • аризаларни 30 кун давомида қабул қилиш;

  • саралаб олинган иштирокчиларни 3 декабрдан кечиктирмай хабардор қилиш.

Муддатлар АҚШ шарқий вақти бўйича белгиланган. Бунда 1 ноябрь – рўйхатга олишни бошлашнинг энг сўнгги муддати ҳисобланади. Аризаларни қабул қилиш бошланадиган аниқ санани идора кейинроқ эълон қилиши лозим.

Дастур учун рўйхатга олиш жараёни 2025 йил кузида ўтказилиши керак эди. Бироқ 5 ноябрь куни Давлат департаменти иштирок этиш тартибини ўзгартираётганини ва янги саналарни кейинроқ эълон қилишини билдирди. 2026 йил август ойида Red Eagle Law лотерея бошланишига эришиш мақсадида судга мурожаат қилди.

Diversity Visa дастури АҚШга иммиграция даражаси нисбатан паст бўлган мамлакатлардан чиққан шахслар учун ҳар йили 55 мингтагача виза ажратишни назарда тутади. Лотереяда ғолиб чиқиш виза учун ариза топшириш имкониятини беради, бироқ автоматик тарзда грин-карта олишни англатмайди. Иштирокчилар дастур талабларига мос келишини тасдиқлаши ва белгиланган жараёнлардан ўтиши зарур.

Доналд Трамп ўзининг биринчи президентлик муддатидаёқ грин-карта ўйналишига қарши чиққан эди. 2025 йил декабрь ойида у Браун университетидаги отишмада гумон қилинувчи айнан шу дастур орқали АҚШ ҳудудига кириб келганини рўкач қилиб, уни тўхтатиб қўйди.