Тошкент халқаро аэропортида Дубайдан келган йўловчининг юкидан декларацияда кўрсатилмаган, қиймати 1,293 млрд сўмлик заргарлик буюмлари ва олтин қуймалари аниқланди. Бу ҳақда «Тошкент-Аэро» ихтисослаштирилган божхона комплекси хабар берди.
Божхона назорати вақтида фуқаронинг юки орасидан соф оғирлиги 921,37 грамм бўлган 141 дона заргарлик буюми ҳамда учта олтин қуймаси топилган.
Экспертиза хулосасига кўра, аниқланган заргарлик буюмлари ва олтин қуймаларининг умумий қиймати 1 млрд 293 млн сўмни ташкил этган.
Шунингдек, юклар орасидан акциз маркалари бўлмаган 120 қути тамаки ва 90 дона никотинли снюс маҳсулоти ҳам аниқланган.
Ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.
