«Сити» яккапешқадамга айланди, «Реал» дербида ютқазди. Кун ўйинлари
|11:08 / 21.09.202612 33211 мин
Абдуқодир Ҳусанов тушмаган ўйинда «Манчестер Сити» «Сандерленд»га 5 та гол урди, аммо 3 та ўтказиб юборди. «Шаҳарликлар» бу ғалабадан кейин халқаро танаффусга турнир жадвали пешқадами сифатида йўл олди. Мадрид дербиси эса ҳакамлик можаросига айланди. Якшанба оқшомида рўй берган асосий воқеалар, ўйинлардаги голлар ва турнир жадвалидаги вазият.
Фото: Global Look PressФото: Global Look Press
Англия: Ҳоланд гешталтни ёпди, «МЮ» яна очко йўқотди
Энцо Мареска АПЛда қаторасига иккинчи ўйинда Абдуқодир Ҳусановни захира ўриндиғида қолдирди (ўзбекистонлик ҳужумчи ҳафта ўртасида Лига кубогида «Норвич»га қарши ўйинда бошланғич таркибда тушганди), у ишонч билдирган ҳимоя чизиғи эса учта гол ўтказиб юборди.
Ўйин Энцо Фернандеснинг «Манчестер Сити» сафидаги илк голи билан бошланди. Аргентиналик яримҳимоячининг ўрнида аксар футболчилар жарима зарбасидан классик тарзда тўпни шерикларига етказиб берган бўларди, у эса тўпни жонли деворни айланиб ўтган ҳолда дарвозабоннинг яқин бурчагига йўналтиришга қарор қилди.
Аммо «Сандерленд» бу шедеврдан карахт ҳолатга тушмади ва тезда Ле Фенинг Броббига марказий ҳимоячилар орасидан ўтказиб берган паси орқали мувозанатни тиклади. Бўлим ўрталаридан ўтганда жамоалар яна бир мартадан гол алмашишди. «Шаҳарликлар» рақиб жарима майдони атрофида кучли прессинг уюштириши Шеркининг голи билан якунланди, «қора мушуклар» эса бунга Мене ҳужумга қўшилиб, Броббини бўш дарвоза қаршисига чиқариши билан жавоб қайтаришди.
Аммо биринчи бўлим охирида Энцо Мареска шогирдлари ҳисобни барибир ўз томонига оғдиришди. Гейи тўп учун курашда ютиб чиққанидан Семенё қулай вазиятда туриб дарвоза тўрини «ўққа тутди», бироз ўтиб Ҳоланд ўйин тақдирини ҳал қилиб қўйиши мумкин эди, аммо бўш дарвозани ишғол эта олмади.
Иккинчи бўлимда Семенё дублни расмийлаштирди, аммо бу билан ўйин масаласи ҳал бўлмади, меҳмонлар ҳужумчиси Бробби бу голга ҳам жавоб қайтарди. Нидерландиялик футболчи Ангулонинг узатмасидан кейин ҳет-трикка эришди. Меҳмонлар ҳисобни тенглаштириш учун кучли босим уюштиришди ва мунтазам равишда тўпни рақиб жарима майдонига етказиб туришди. Шундай вазиятлардан бирида Доннарумма тўпга чиқишда хатога йўл қўйди ва бу вазият Рубен Диаш тўпни дарвоза чизиғи устидан олиб чиқиши билан якунланди.
Мавзуга оид
Бу ўйиннинг бурилиш нуқтасига айланди ва шундан кейин меҳмонларда ҳисобни тенглаштириш учун куч тугай бошлади. Шундай вазиятда Ҳоланд катта саҳнага чиқди ва ўйинга нуқта қўйди. Эрлинг бу голни ҳам нишонламади, ҳолбуки «Сандерленд» АПЛда ушбу норвегиялик ҳужумчи гол ура олмаётган ягона жамоа бўлиб турганди. Энди у лигада ўзи қарши ўйнаган 25 жамоанинг барчасига гол урган футболчига айланди.
Асосийси эса «Сити» «Арсенал»нинг бу турда очко йўқотишидан фойдаланиб, турнир жадвалида яккапешқадамга айлангани бўлди: «шаҳарликлар» беш турдан кейин юз фоизлик натижа қайд этган ҳолда халқаро танаффусга йўл олди. Лекин Мареска шогирдларини танаффусдан кейин қийин тақвим кутмоқда: жамоа АПЛдаги кейинги 5 ўйинидан учтасини «Ливерпул», «Астон Вилла» ва «Ноттингҳэм» каби қийин рақибларга қарши сафарда ўтказади.
Параллел равишда Борнмутда кечган учрашув Манчестердаги ўйин фонида анча зерикарли тус олди. Икки жамоа ҳам майдон марказида устунликка эришиш учун яккакурашларга эътибор қаратди ва голли вазиятлар деярли кузатилмади. Биринчи бўлимдаги энг асосий эпизод Алиссон яқин бурчакка кетаётган тўпни олиб чиқиши бўлди. Иккинчи бўлимда эса ўнг қанотда ўйнаган Гакпонинг саъй-ҳаракатларидан кейин тўп майдонда қолди ва якунда қулай вазиятда турган Исакка етиб келиб, ҳисоб очилди. Мерсисайдликлар ғалабали ҳисобни ушлаб қолишди ва турнир жадвалида 6-ўринга кўтарилишди.
«МЮ» мавсум стартидаги беш ўйинда тўртинчи бор очко йўқотди. «Фулҳэм» майдонида кечган ўйиннинг биринчи бўлимида ҳисоб очилмай қолди, иккинчи бўлимда эса «қизил иблислар» ҳимоядан чиқишда хатога йўл қўйишди. Майнунинг хато паси рақиб қарши ҳужумига сабаб бўлди. Ламменс зарбадан кейин жамоасини қутқарганди, аммо тўп Лисандро Мартинесга теккан ҳолда дарвоза тўрига бориб тушди. Меҳмонлар фақат ўйин охирида шу куни марказий ҳужумчи позициясида тушган Матеус Кунянинг голи эвазига мағлубиятдан қутулиб қолишди. Бунда манчестерликларга ҳам омад кулиб боқди дейиш мумкин, шу куни бир неча бор ажойиб сейвлар ижро этган Лено бу вазиятда ҳам қутқариши мумкин эди, аммо тўп ҳимоячига теккан ҳолда йўналишини ўзгартириб, дарвоза тўрига бориб тушди.
«Юнайтед» мағлубиятдан қутулиб қолди, аммо жамоанинг турнир жадвалидаги ҳолати аянчли: Майкл Кэррик шогирдлари АПЛнинг беш туридан кейин атиги 5 очкога эга ва ўз тарихидаги энг ёмон стартни такрорламоқда.
Мадрид дербиси арафасида икки жамоа бош мураббийлари туннелдан қалин дўстлар каби қўл ушлашиб чиқиб келишди, аммо майдонда футболчилар бир-бирига қарши аёвсиз душманлардек муносабатда бўлишди.
Биринчи бўлим давомида «Атлетико» футболчилари нақ 10 марта фол ишлатишди («Реал» учта фол билан кифояланган). Бундай ўйин учун мезбонлар озчилик бўлиб қолиши мумкин эди, аммо ҳакамлар аввалига Кристиан Ромерони, кейин эса Ли Кан Инни кечиришди.
Биринчи эпизодда аргентиналик ҳимоячи бутсасининг остки қисми билан Жуд Беллингҳэмнинг тиззасини босиб олганди. Бу вазиятда ҳакам Мигел Анҳел Ортис Аряс аввалига инглиз футболчисига сариқ карточка кўрсатди, аммо VAR аралашувидан кейин бу карточка бекор қилиниб, «Атлетико» футболчиси огоҳлантирилди.
«Реал» футболчиси эса қизил кутишганди, лекин улар бутун жамоа бўлиб ҳакамнинг қарорига таъсир кўрсата олишмади.
Кейин эса Ли Кан Ин Феде Валвердега қарши қўполлиги учун ҳеч қандай карточка олмади, ҳолбуки у бутсасининг остки қисми билан рақибнинг тўпиқ соҳасига зарба берганди.
Иккинчи бўлим бошида эса арбитр «Реал» дарвозасига пеналти белгилади, етмаганига Дин Ҳаусенга тўғридан тўғри қизил карточка ҳам кўрсатди. Бу вазиятда «Реал» ҳимоячиси жарима майдонига ёриб кирган Жулиано Симеонени ортдан ушлаб қолганди ва бу сўнгги умид фоли деб баҳоланди.
Александр Грималдо пеналтини аниқ ижро этиб, ҳисобни очди. Мезбонлар бу билан тўхташмади ва ўйин масаласини узил-кесил ҳал қилиб қўйиш учун олдинга ташланишди. 59-дақиқада Симеоне ерлатиб узатма берди, Конате ва Думфрис орасидаги бўшлиқдан ёриб кирган Жонатан Дэвид эса дарвозабонга ҳеч қандай имконият қолдирмади. Алваресдан асосий таркибни олиб қўйган ушбу канадалик ҳужумчи қаторасига учинчи турда гол урмоқда.
«Атлетико» сон жиҳатдан устунликдан фойдаланиб, ҳисобни йирик кўринишга келтириши мумкин эди, аммо Куртуа бир неча бор муқаррар голдан қутқариб қолди. Ўйин охирида эса мезбонлар бироз бўшашди ва меҳмонларда ҳам имкониятлар юзага кела бошлади. Аввалига Диоманде Облакнинг ҳушёрлигини синовдан ўтказди, кейинги эпизодда эса Бернардунинг жарима зарбасидан узатган пасини барчадан баланд сакраган Рюдигер голга айлантирди.
«Реал» сўнгги дақиқаларни штурм билан ўтказди, аммо «Атлетико» ғалабани қўлдан чиқармади. «Реал» тўрт йилдан буён ла лига доирасида «Атлетико»ни «Метрополитано»да мағлуб этолмаяпти.
Энди «Барселона» «Реал»дан олти очкога ўзиб кетди, иккинчи ўриндаги «Атлетико»дан эса беш очко кўп тўплаган. Каталонияликлар бутун мавсум давомида ҳозиргидек бенуқсон ўйин кўрсатиши даргумон, лекин стартда юзага келган фарқ чемпионлик масаласини ҳал қилиб қўйиши мумкин.
«Бетис»ни иккинчи ўриндан бир неча дақиқа ажратиб турганди, аммо ўйин охирида Натан қулай имкониятдан фойдалана олмади ва ҳисобдаги устунлик мустаҳкамланмади. Кейин эса Мануэл Пеллегрини жамоаси ҳимояда хатога йўл қўйди ва Сориано тўпни ҳимоячилар ортига очилган Виляресга ташлаб берди. Ғалабани қўлдан чиқарган «Бетис» «Реал»дан бир очко тўплаган ҳолда учинчи ўринда жойлашган, аммо қўшимча кўрсаткичларга кўра «Атлетико»ни олдинга ўтказиб юборган.
