Криштиану Роналду миллий жамоадаги фаолиятини якунлаши билан боғлиқ мавзуда янгидан янги гаплар чиқиб келмоқда. Португалия нашрлари қайд этишича, миллий жамоа бош мураббийи Жорже Жезуш 41 ёшли форвард таркибга қайтиши учун ундан омма олдида узр сўрашга тайёр. Бу вақтда эса ўзбошимчалик билан жамоа қароргоҳини тарк этгани учун футболчига дисквалификация таҳдиди юзага келган.
Мураббий Криштианунинг ортидан аэропортга отланган
Роналду ва Жезуш ўртасидаги можаро чўққиси 30 сентябр кунига тўғри келди. Мураббийнинг Данияга қарши ўйиндан олдинги матбуот анжуманида айтган сўзларидан кейин футболчи нарсаларини йиғиштирган ва миллий жамоа қароргоҳидан кетиб қолган. Уни олиб кетиш учун аэропортга хусусий жет чақирилган.
Marca нашри ёзишича, Жорже ва Португалия футбол федерацияси (FPF) раҳбари Педру Проэнса Роналдуни фикридан қайтариш учун унинг ортидан аэропортга йўл олишган. Лекин бу ҳаракат ёрдам бермаган: футболчи уларни эшитишни ҳам истамаган ва учиб кетган.
FPF регламентига кўра, Криштиану бир ойдан олти ойгача муддатга дисквалификация қилиниши, шунингдек, унга жарима қўлланиши керак.
«Терма жамоага чақирилганидан сўнг ўзбошимчалик билан жамоа жойлашган ҳудудни тарк этган ёки миллий жамоалар иштирокидаги машғулотларга, ўйинларга ёки бошқа тадбирларга узрли сабабларсиз келмаган футболчига бир ойдан олти ойгача дисквалификация қўлланади», – дейилган федерация регламентида.
Журналист Педро Сепулведа Португалиядагилар афсонавий футболчи билан муносабатларни сақлаб қолиш учун яна бир уриниб кўришга тайёрлиги ҳақида хабар берди. Унинг айтишича, Жезуш Миллатлар лигаси гуруҳ босқичи доирасида Данияга қарши кечадиган ўйиндан кейиноқ Криштианудан узр сўраб, уни миллий жамоадаги фаолиятини якунлаш қарорини ўзгартиришга ундамоқчи.
Бу вақтда O Jogo нашри Роналду қарори «қайта кўриб чиқмаслиги» ҳақида ёзган. Форвард «ўзини хиёнатга учрагандек» ҳис қилмоқда.
Нималар бўлди?
Мураббий ва футболчи ўртасидаги муаммо Миллатлар лигаси гуруҳ босқичи 2-турида Норвегияга қарши кечган ўйинда (2:1) бошланганди. Жезуш ўша ўйинда Роналдуни бошланғич таркибга киритмаганди, шу билан бирга, унга иккинчи бўлимда майдонга туширишни ваъда қилганди. Аммо амалда мураббий уни ўйин охиригача захира ўриндиғида қолдирди ва Криштиану буни келишувни бузиш деб ҳисоблади.
