Индонезияда 5,9 магнитудали зилзила юз берди

Индонезия оролларидан бирининг соҳилида 5,9 магнитудали зилзила қайд этилди. Бу ҳақда АҚШ Геологик хизмат сайтида хабар тарқатилди. 

Ер ости силкинишлари маҳаллий вақт билан соат 11:21да (Тошкент вақти билан 9:21) содир бўлган. Зилзиланинг эпимаркази Котабуми шаҳридан 55 километр жануби-ғарбда Суматра оролининг жанубий бурчагида деб белгиланди. 

Зилзила ўчоғи 132,7 километр чуқурликда жойлашган. Ер қимирлаши оқибатида вайронагарчиликлар ва қурбонлар ҳақида хабар берилмаган. Цунами хавфи тўғрисида ҳам маълумот йўқ. 

2016 йилнинг март ойида ҳам Индонезияда зилзила содир бўлган. Ўшанда цунами хатари тўғрисида огоҳлантирилган эди.