АҚШнинг янги сайланган президенти Дональд Трамп, ўз вазифасига киришганидан сўнг илк юз кунида ва ҳатто биринчи кунидаёқ амалга ошириши мумкин бўлган режаларини маълум қилди. У ўз режаларига ойдинлик киритувчи видеомурожаатни эълон қилди.
Унинг ушбу видеолавҳада айтган сўзлари Трампнинг сайловолди дастурини деярли такрорлайди. АҚШнинг янги президенти савдо келишувлари, энергетика, миграция, миллий хавфсизлик ва давлат бошқарувига оид режаларини маълум қилган. Республикачи давлат раҳбарининг сўзларига кўра, унинг дастури негизида "Америка манфаатлари биринчи ўринда туради", бу эса "Американи яна буюк қилиш" ва "ўрта синфни қайта шакллантириш"га ёрдам беради.
Шундай қилиб, Дональд Трамп ўз вазифасига киришгач, 100 кун ичида қуйидагиларни амалга оширмоқчи:
ТТҲдан чиқиш
Сиёсатчи АҚШнинг Транстинч океани ҳамкорлиги келишувидан чиқиши бўйича ишларни биринчи кунданоқ бошлашини таъкидламоқда.
"Мен мамлакатимиз учун улкан ҳалокат бўлувчи Транстинч океани ҳамкорлигидан чиқиш ҳақида огоҳлантириш юбориш ниятидаман. Бунинг ўрнига биз адолатли икки томонлама савдо битимлари бўйича музокаралар олиб борамиз. Бу эса Америкага иш ўринлари ва ишлаб чиқаришни қайтаради", — деган Трамп
Энергетика
Трамп вазифасига киришган илк кунларидаёқ, углеводород бойликларини, хусусан соҳилбўйи конларини ўзлаштиришга ўрнатилган чекловларни бекор қилмоқчи.
"Мен Америкада энергия ишлаб чиқариш соҳасида иш ўринларини йўқ қилаётган чекловларни бекор қиламан. Соҳилбўйи энергия захиралари ва кўмир қазиб олишни тиклаш билан миллионлаб юқори ҳақ тўланадиган иш ўринлари барпо этилади. Бу айнан биз хоҳлаётган ва кутаётган нарсадир", — дея баёнот берган президент.
Хавфсизлик
Дональд Трамп шунингдек, ҳарбийларга "ўта муҳим инфратузилмалар" хавфсизлигини таъминлаш бўйича топшириқ беришини билдирган.
"Мен мудофаа вазирлиги ва штаблар раҳбарлари бирлашган қўмитаси раисидан Американинг ўта муҳим инфратузилмаларини киберҳужумлар ва бошқа турдаги ҳужумлардан ҳимоя қилиш бўйича кенг қамровли режа тузишни сўрайман", — деган Трамп, аммо бу режада нималарга эътибор қаратилиши хусусида сўз юритмаган.
