Россия Федерацияси президенти Владимир Путин ҳар йилги анъанавий катта матбуот анжуманида иштирок этди. Унда бир қатор муҳим аҳамиятга молик масалалар юзасидан фикр алмашилди.
Россия ва Украина муносабатлари барибир қачондир яхшиланади
Россия президенти Владимир Путин Россия ва Украина муносабатлари ҳақида ўз фикрини билдириб ўтди. «Ишончим комилки, бизда Украина билан муносабатлар қачондир барибир яхшиланади ва изга тушади», - деди Путин.
Трампнинг АҚШ ядро қуроли ҳақидаги гаплари ҳақида
Владимир Путин АҚШнинг сайланган президенти Дональд Трампнинг Вашингтон ядро кучини янада мустаҳкамлаш ҳақидаги фикрлари ҳақида ҳам сўз юритди.
«Қўшма Штатларнинг сайланган президенти жаноб Трампга келадиган бўлсак, бу ерда ҳеч қандай янгилик йўқ. У ўзининг сайловолди кампаниясида АҚШ ядро кучини, қуролли кучларни мустаҳкамлаш ҳақида гапирганди. Бу ерда ҳеч қандай ноодатий нарса йўқ», - деди президент.
Спорт кишиларни ажратиши эмас, бирлаштириши керак
Путин допинг билан кураш олиб бораётган халқаро ташкилотлар ишида очиқликнинг муҳимлиги ҳақида маълум қилди.
«Бутунжаҳон допингга қарши агентлик (WADA)? Уларнинг фаолиятига баҳо беришга ҳуқуқимиз бор, деб ўйламайман. Буни Халқаро олимпия қўмитаси қилиши керак.
Ишончим комилки, исталган допингга қарши агентлик фаолияти шаффоф ва текширувдан ўтказиладиган бўлиши керак. Биз иш натижаларидан хабардор бўлишимиз керак – кимни текширишмоқда, қандай усул билан, натижалар қандай ва айбдорларни жазолаш учун қандай чоралар кўрилади.
Нимага бу худди мудофаа соҳаси каби ёпиқ тарзда қилинади? Бундай соҳада очиқлик керак», - дея маълум қилган Путин.
«Албатта сиёсий томонлар ҳам борлигини инобатга олиш керак. Спортга сиёсатни аралаштирмаслик шарт. У кишиларни ажратиши эмас, балки бирлаштириш керак», - қўшимча қилди Россия президенти.
Солиқларимиз дунёдаги энг паст бўлиб қолмоқда
Владимир Путиннинг айтишича, 13 фоизлик солиқ амалга татбиқ этилган 2000-йиллар бошида кўплаб иккиланишлар бўлган, бироқ эндиликда бу йиғимлар етти маротабага ошган.
Путиннинг фикрича, жисмоний шахслар даромадига бўлган фарқланувчи солиқларга ўтиш мақсадга мувофиқ эмас.
«Ижтимоий адолатга бошқа йўллар билан ҳам эришиш мумкин», - деди у. Президентнинг мисол келтиришича, қимматбаҳо мол-мулк ва автомобилларга солиқ шулар жумласидан.
