АҚШ ва Украина президентлари ўртасида сиртқи тортишув давом этмоқда. Доналд Трамп энди Володимир Зеленский «урушни тугатишни истамаслиги» ҳақида гапириб чиқди.
«Европа унга сахийлик билан ажратаётган катта миқдордаги пуллар, шунингдек, бир вақтлар қўли эгри [АҚШ собиқ президенти Жо] Байден тақдим этган пулларни ҳисобга олсак, у урушни тугатишни истамайди ва катта эҳтимол билан ҳеч қачон буни истамаган ҳам», – дея ёзди Трамп Truth ижтимоий тармоғида.
АҚШ президенти фикрича, икки йил муқаддам Зеленский «ҳозиргидан фойдалироқ келишувга эришиши мумкин эди». «Унинг мамлакати вайронага айланган, ҳудудларнинг катта қисми бой берилган», – деган Трамп ва Украина денгиз ва океанларга чиқиш имкониятини йўқотиб, унинг эркак жинсли аҳолиси қисқариб кетгани – кўпчилик «ўлдирилгани ёки яралангани»ни қўшимча қилган.
АҚШ молия вазири Скотт Бессент ҳам Зеленский уруш тугашини Украинанинг ғалабасига боғлаш орқали «ёлғон дилемма»ни илгари сураётганини айтди. «Урушни тугатиш музокаралар орқали маълум келишувларга эришишни назарда тутади. Президент Трамп ҳар куни бунинг устида ишламоқда. У президентлик даврининг бошиданоқ шу иш билан шуғулланиб келмоқда», – дея қайд этган Бессент NBC News телеканалига берган интервюсида.
У Қўшма Штатларни Украинада Starlink фаолиятини чеклашда айблаган Зеленскийни «эҳтиёт бўлиш»га чақириб, унинг бу борадаги сўзлари мутлақо асоссиз эканини таъкидлаган.
Володимир Зеленский эса Россияга эмас, балки Украинага босим ўтказиш орқали уни ён беришга мажбурлашаётганидан шикоят қилди. «Мен ҳисоблайманки, Украинани таслим бўлишга ундовчи қадамлар ташланди», – деди Зеленский Bloomberg агентлигига берган интервюсида.
Мен буни ҳамкорларимиз ўз олдига қўйган мақсад демайман. Ме америкалик ҳамкорларимиз урушни Украина ҳисобига эртароқ якунлаш мумкин деб ҳисоблаши ҳақида ўйлашни истамайман. Аммо бу шундай кўринмоқда.
Зеленский АҚШ Starlink’нинг Украинадаги тезлигини қасддан пасайтиргани (ва бу Украина қуролли кучлари операцияларини хавф остида қолдиргани), шунингдек, Patriot ҳаво ҳужумидан мудофаа тизимлари учун ракеталар етказиб беришни кечиктираётганини яна бир бор таъкидлади.
«Сўнгги таклифим шундай бўлганди: биз Россиядаги дизел ишлаб чиқариш саноатига зарба бермаймиз, сиз эса бизга объектларимизни ҳимоя қилиш учун Patriot ракеталарини берасиз. Аммо улар биз шунчаки дизел ёқилғиси ишлаб чиқаришга ҳужум қилишни тўхтатишимизни хоҳлашмоқда. Агар биз унга зарба берадиган бўлсак, улар бизни бошқа нарсадан узиб қўймоқда», – деди Зеленский.
