Нью-Йоркдаги мактаблар қор бўрони туфайли ёпилади

Нью-Йоркдаги мактаблар 9 февралда АҚШнинг шимоли-шарқига ёпириладиган қор бўрони сабабли ёпилади. Бундай қарорни шаҳар раҳбарияти қабул қилган. 

"Қор ёғиши сабабли Нью-Йоркдаги барча мактаблар пайшанба куни ёпилади", деб маълум қилган шаҳар мэри Билл Де Блазио.

Метеорологик хизматлар Нью-Йорк, Филадельфия, Питтсбург, Бостон ва АҚШ Шарқий соҳилидаги бошқа шаҳарларга 9 февралга ўтар кечаси қор бўрони яқинлашишини маълум қилган. Тахмин қилинишича, қор кун бўйи ёғади. weather.com портали маълумотларига кўра, 30 см гача қор ёғиши мумкин. 

Нью-Йоркнинг фавқулодда вазиятлар департаменти қор бўрони пайшанбанинг соат 18.00гача (Тошкент вақти билан 10 февраль соат 04.00) давом этишидан огоҳлантирган.