Германия УЕФАга 2024 йилги Европа чемпионати мезбонлиги учун расман ариза билан мурожаат қилди. Бу ҳақда Германия футбол иттифоқи (DFB) сайтида маълум қилинган.
Хабар қилинишича, 28 февраль куни УЕФАнинг Ньон шаҳридаги қароргоҳида DFB президенти Райнхард Гриндел ва УЕФА бош котиби Теодор Теодорис ўртасида учрашув бўлиб ўтган. Ушбу учрашув вақтида Гриндел аризани Теодорисга топширган.
УЕФА бош котиби 40 саҳифали мурожаатни қабул қилган, унда Германия Евро-2024 ўйинларини 17 шаҳар бўйлаб ўтказа олиши тақдимот қилинган.
Турнир мезбони 2018 йилнинг сентябрида маълум қилинади.
Маълумот учун, Германия 1988 йилда Европа чемпионатига мезбонлик қилган, шунингдек, 1974 ва 2006 йилларда жаҳон чемпионатини қабул қилган.
