Европа лигаси финалида «Манчестер Юнайтед» ва «Аякс» клублари тўп сурадиган бўлди.
Ярим финалнинг биринчи ўйинини Вигода ўтказиб, 1:0 ҳисобидаги ғалаба билан қайтган «Манчестер Юнайтед» «Олд Траффорд»да 1:1 ҳисобида дуранг ўйнади.
«Аякс» эса «Лион» тўсиғидан ўта олди. Нидерландияда ўтган биринчи ўйин мезбонларнинг 4:1 ҳисобидаги ғалабаси билан якунига етганди. Лионда эса «Аякс» 1:3 ҳисобида имкониятни бой берди, лекин бу финалга чиқиш учун етарли бўлди.
12 кундан кейин бу икки жамоа Стокҳолмдги «Френдс Арена» стадионида бош соврин учун майдонга тушади.
«Тарихдаги энг муҳим ўйин»
Жозе Моуриньо – ОАВ билан ишлаш борасида дунёдаги энг зўр мураббий. Журналистлар билан суҳбатларда, у ўзига хос тарзда ўзига хос сўзлар билан вазиятдан чиқиб кетади, унинг сўзлари рақиб жамоа футболчилари ҳамда мухлисларига ҳам таъсир кўрсатади. «Сельта»га қарши ўйиндан аввал португалиялик мутахассис пафос билан гапирди:
«Испанлар буни «Сельта» тарихидаги энг муҳим баҳс дейишмоқда. Менингча эса бу бизнинг тарихимиздаги энг муҳим баҳсдир. Аввалги баҳслар қанчалик муҳим бўлгани муҳим эмас. Мен «Сельта»нинг ғалабага бўлган истаги «Манчестер Юнайтед»никидан кўп деб ўйламайман. Бизнинг вазиятимиз шундай: 7 ҳафтада 16 футболчи билан 17 ўйин ўтказиш. Бу ақл бовар қилмас иш! Биз футболчилар билан бор кучимизни майдонга ташлаймиз», – дея сўзини якунлаган Моуриньо олқишларга сазовор бўлганди.
Қайд этиш керакки, «Сельта» охирги дақиқаларда Гвидетти гол ура олмагани учун манчестерликлар финалга чиқди. Бу учрашувдан олдин манчестерликларнинг фахрий футболчилари Гари Невилл ва Рой Кин тинимсиз равишда жамоа ўйинини танқид қилаётган, жамоа етакчиларидан бири Поль Погбанинг трансфери ФИФА томонидан шубҳа остига олинганди. Мураббий ўйиндан олдин тиғиз графикдан нолиди. У ўйиндан кейин ҳам тиғиз графикдан нолиди.
«Биз биринчи ўйинда ҳақли ғалабага эришган бўлсак-да, жавоб ўйини учун интрига сақланиб қолганди. Биз билан тенгма-тенг кураша олган «Сельта» футболчилари олқишга лойиқ.
14 беллашувдан сўнг биз финалга қадар етиб келдик. Унда ғалаба қозонсак, ўзимни бахтли ҳис қиламан. Бу жуда ажойиб бўларди.
«Аякс»дек ёш ва кучли жамоа билан ўйин осон бўлмайди. Мавсум якунида финалга тайёргарлик учун «Аякс»да 12 кун вақт бўлади. Биз эса бу кунлар ичида яна 3 та беллашув ўтказишимиз керак бўлади», деди Моуриньо.
