Мактабни ташлаб кетган кореялик шахс компанияси бозордаги қиймат бўйича LG’ни ортда қолдирди

Жанубий Кореянинг Netmarble Games видеоўйинлар ишлаб чиқарувчиси савдоларнинг илк кунида IPO нархи билан таққослаганда 3,2 фоизга ўсди. Шу тариқа компаниянинг бозордаги қиймати 12,2 миллиард долларни ташкил этиб, фирма бу кўрсаткич бўйича LG Electronics’ни ортда қолдирди.

Bloomberg агентлиги маълумотига кўра, Netmarble Жанубий Кореяда сўнгги 7 йил давомида бозорга чиқиш бўйича энг яхши натижани кўрсатди.

Биржага чиқиш Netmarble’га дарҳол бозордаги қиймат бўйича дунё ишлаб чиқарувчилари орасида бешинчи ўринни эгаллаш имконини берди. Ундан юқори поғоналарда фақатгина йирик компаниялар бор: Sony, Activision, Nintendo ва Electronic Arts.

Netmarble 2000 йилда Пан Жун Хьюк томонидан ташкил этилган. У юқори мактабни ташлаб, видеоўйинлар билан шуғулланишга қарор қилган. Компания смартфонлар учун ўйинлар чиқаради. У Lineage II: Revolution чиққанидан сўнг, 2017 йилда мобил ишлаб чиқарувчилар даромади бўйича дунёда учинчи ўринни эгаллади.