Тереза Мэй фавқулодда йиғилиш ўтказади, Лондон метросидаги портлаш теракт сифатида баҳоланди

Буюк Британия бош вазири Тереза Мэй Лондон метросида портлаш юз бергани туфайли фавқулодда қўмита йиғилишини ўтказади.

Sky News’нинг хабар беришича, йиғилиш маҳаллий вақт билан соат 13:00 (Тошкент вақти билан 17:00)да бўлиб ўтади.

«Менинг фикр-ўйларим «Парсонс Грин»да жароҳатланганлар ва террорчилик хуружини жасурлик ила қабул қилган тезкор хизматлар билан бирга», - дея маълум қилди Мэй.

Reuters тарқатган хабарга кўра, Скотленд-Ярд «Парсонс-Грин» бекатидаги портлашни терроризм билан боғлиқ ҳодиса сифатида баҳоламоқда.

«Комиссар ёрдамчисининг ўринбосари Нейл Басу, аксилтеррорчилик бўлимининг катта мувофиқлаштирувчиси рўй берган ҳолатни терроризм билан боғлиқ ҳодиса сифатида эълон қилди», - дея маълум қилишган полициядан.

Аввалроқ Лондон метросининг «Парсонс-Грин» бекатида портлаш юз бергани хабар қилинганди.