Янги ўқув йилида йўловчиларга қулай, хавфсиз ва сифатли хизмат кўрсатиш мақсадида Тошкент метрополитенида йўловчилар оқимининг ортишига пухта тайёргарлик кўрилмоқда, деб хабар берди метрополитен расмий канали.
Хабарга кўра, куннинг тиғиз вақтларида барча йўналишларда поездлар ҳаракати интерваллари қисқартирилади:
Қайд этилишича, ҳаракат интерваллари Чилонзор йўналишида 1,5–2 дақиқагача, Ўзбекистон йўналишида 3 дақиқагача, Юнусобод йўналишида 4 дақиқагача ва ерусти ҳалқа йўли йўналишида 7–8 дақиқагача қисқартирилади.
Шунингдек, 2026 йил давомида метрополитен вагон паркини 14 та замонавий ҳаракат таркиби билан тўлдириш режалаштирилган.
Бугунги кунга қадар уларнинг 11 таси метрополитен вагон паркига етказиб берилган бўлиб, яқин кунларда яна 3 та замонавий ҳаракат таркибининг олиб келиниши кутилмоқда.
Йўловчиларга хизмат кўрсатиш сифатини янада ошириш, бекатларда хавфсизликни таъминлаш ҳамда йўловчилар оқимини самарали бошқариш мақсадида куннинг тиғиз вақтларида барча 50 та метро бекатида навбатчилик тизими йўлга қўйилган.
